Ta o David llelotar katar o Baala kai si ando Juda, ta lea llelo sa o foro te anen kotar e arka e Devleki kai angla la blagosin o anav e Devleko kai si le sa e zor, ta kai si maskar e kerubinura.
Ta thode e arka e Devleki pe iek bordon nevo, ta ande la katar o cher e Abinadabeko kai saia pe burdura. Ta e chaurre katar o Abinadab o Uza ta o Ajio, inllarena o bordon nevo.
Kana phende e charoke o David kai o Del blagosisarda e porodo katar o Obed Edom ta sa leko cher, o David llelo veselimaia kai o Obed Edom ta anda e arka e Devleki ando foro e Davideko.
Kana e arka e Devleki avili kai o foro e Davideko, e Mikal chorri e Sauleki dikhla katar iek penllerava sar o charo jutela ta cherela iek chelipe Devlikano angla o Del, ta marda letar espurnia ande po lio.
Ta o David fulada sa e foroke, sa e llenenge katar o Israel, murusenge ta diskinienge, suakoneke iek marrno, kotor mas ta iek marrno cherdo katar e drak. Ta mapalal sa o foro llelotar kai po cher.
O David irisailo te blagosil po cher. Ta kana e Mikal likisti te maladol e Davidea, phenda leke: ¡Gia sukar dikhola allive o charo katar o Israel, kana sikadola angla leke sluge sargo iek lleno kai inai leke lallao!
Ondaka o David phenda e Mikalake: Cherdem le angla o Del kai esvirisarda man angla cho dad ta angla sa leko porodo te avav gazda e Israeleko, o foro katar o Del. Goleke ka cherav chelipe Devlikano angla o Del.