Ka o daa lan chaŋ ti tuhi nyaŋ Mɔabnima, ka chɛ ka bɛ dɔni tiŋa m-pie taba ʒii buta zuɣu, ka o chɛ ka bɛ ku ʒii buyi zuɣu niriba zaa ka chɛ yim zuɣu niriba. Ka Mɔabnim’ maa daa leei Dauda daba, ka yɔri farigu o sani.
Ka Dauda daa lan chaŋ ti tuhi nyaŋ Hadadɛza ŋun daa nyɛ Rɛhɔb bia ka nyɛ Zɔba naa la, saha shɛli ŋun Hadadɛza ni daa chaŋ ni o ti tuhi deei Yufretiiz Mɔɣili polo la.
Di saha ka Dauda daa tahi tɔbbihi ti ʒili Damaskus ka Sirianim’ maa daa leei Dauda ni su shɛba, ka bɛ yɔri farigu o sani. Ka Yawɛ daa chɛ ka Dauda kul diri nasara o ni chaŋ luɣ’ shɛlikam.
ka o daa tim o bia Jɔram ni o cham’ ti puhi Naa Dauda ni o zuɣusuŋ, o ni daa tuhi nyaŋ Hadadɛza ka di nasara maa zuɣu. Dama ŋun’ Tɔi mini Hadadɛza daa kul tuhirila tab’ waawaayili. Ka Jɔram daa zaŋ pina din nyɛ salima mini anzinfa ni daanya n-chaŋ ti ti Naa Dauda.
O daa fa li la Ɛdomnim’ mini Mɔabnim’ ni Ammɔnnim’ ni Filistianim’ ni Amalɛknim’ sani, ni o ni daa tuhi nyaŋ Hadadɛza Rɛhɔb bia ŋun daa nyɛ Zɔba naa la ka di neen’ shɛŋa la zaa.
Ka o daa tahi tɔbbihi ti ʒili Ɛdom; o daa ʒili tɔbbihi Ɛdom tiŋgbɔŋ ni luɣilikam. Ka Ɛdomnim’ maa zaa daa leei ŋun’ Dauda ni su shɛba. Ka Yawɛ daa kul tiri Dauda nasara luɣ’ shɛlikam zaa o ni chaŋ.