Ak kibar Moab, ak kiikwa ichek eng’ borowet, king’at koruiyo eng’ ng’ony, ak kiikwa eng’ boroonik aeng’ bik che kibarei kobek, ak kichamji kosopcho che bo borowet ne nyiitat. Ak kiek Moabik otwogikab Daudi, ak kiib kagochinoik.
Ak kirebe Daudi inendet murenik elfut agenge ak bogol tisab che kilanyei mbartanyisiek, ak elfusiek tiptem che kibunei kelyek: ak kieb Daudi kutung’oikab mbartanyisiek tugul che kiichuuti karisiek, ago kiituch eng’ choto che yamei karisiek bogol.
Kiinde anyun Daudi irimosiek Suria ne bo Damasko: ak kiek Suriek otwogikab Daudi, ak kiib kagochinoik. Ak kiigochi Jehovah Daudi katerteret eng’ komosta age tugul ne kiwa.
koyokto anyun Toi Joram werinnyi, kwo oldab laitoriat Daudi, kwo kogat inendet ak koberur, amu kiga kobargei ak Hadadeser ak kibar inendet: amu kibargei Hadadeser ak Toi. Ak kiib Joram terenikab feda, ak terenikab tahabu, ak terenikab sugunonik:
che bo Suria, ak che bo Moab, ak che bo lagokab Amon, ak che bo Pilistik, ak che bo Amalek, ak che barunenikab Hadadeser, weritab Rehob, laitoriatab Soba.
Ak kiinde irimosiek Edom; kiinde irimosiek Edom komugul, ak kiek Edomik tugul otwogikab Daudi. Ak kiigochi Jehovah Daudi katerteret eng’ komosta age tugul ne kiwa.