Kä cuɛ ji̱ Mo-ab joc bä, kä cuɛ kɛ jak kä tɔ̱ɔ̱ckɛ cuɛ bäriɛn thɛm kɛ dep. Cuɛ nɛy tin ciek ciëëk näk, kä cuɛ nɛy tin bärikɛn päl a tëk. Kä cu ji̱ Mo-ab a kuaany Dee-bid ti luɔ̱nykɛ jɛ tho̱lbo̱k.
Kä cu Dee-bid ji̱ jiöŋkööri ti bathdɔɔr kɛl wi̱cdɛ kur bärɔw käp, kɛ rɛm nɛɛni ti bathdɔɔri ti jiɛɛn da̱ŋ rɛw. Kä cuɛ jiöŋkööri diaal dɔ̱a̱ŋkiɛn ŋuɔk, cuɛ päl ni jiöŋkööri ti ro̱ŋ kɛ thurbiɛɛli ti kuɔ̱r.
Kä mëë ci ji̱ Thi-ri-ya tëë cieŋ kä Da-math-kɛth ben, ba Ɣä-dɛ̈d-ɛdhɛr kuäär Dho-baa ben luäk, cu Dee-bid kɛ näk nɛy ti bathdɔɔri ti jiɛɛn da̱ŋ rɛw wi̱cdɛ rɛw.
Kä cu Dee-bid wec Da-math-kɛth moc kɛ rɛm. Kä cu ji̱ Thi-ri-ya a kuaanykɛ ti luɔ̱ny kɛ jɛ tho̱lbo̱k. Kä cu Kuoth Nhial jɛ kam buɔ̱m mi joocɛ naath gua̱thni diaal ti̱n cɛ wä thi̱n.
Cu Toy gatdɛ ni Yo-ram jäk kä kuäär ni Dee-bid, kɛ ɣöö bɛ jɛ wä lät kä mal, kɛ ɣöö cɛ nyiëëny kɛ Ɣä-dɛ̈d-ɛdhɛr kä cɛ jɛ joc. Kɛ ɣöö cikɛ kɔn nyiëëny kɛ Ɣä-dɛ̈d-ɛdhɛr, kä cu Yo-ram ciɛk in yian nööŋ kɛɛl kɛ jɛ amäni da̱a̱p kɛnɛ ciɛk in bo̱r.