×

現代台語譯本漢字版

撒母耳記下 9

1
大闢 問講:「 掃羅 的家猶有什麼人留啲?我欲因為 約拿單 的緣故好款待伊。」
2
掃羅 的家有一個僕人叫做 洗巴 ,人叫伊去 大闢 遐;王就問伊:「你是 洗巴 是無?」 伊應講:「你的僕人就是。」
3
王講:「 掃羅 的家猶賰幾個人?我通將上帝的恩施互伊。」 洗巴 對王講:「 約拿單 猶有一個子,伊的雙腳攏跛。」
4
王問伊:「伊佇叨位?」 洗巴 應王講:「伊佇 羅‧底巴 ,住佇 亞米利 的子 瑪吉 𪜶兜。」
5
大闢 王就派人去 瑪吉 𪜶兜給導來。
6
掃羅 的孫, 約拿單 的子 米非波設 來見 大闢 ,仆落去拜伊。 大闢 講:「 米非波設 。」伊應講:「你的僕人佇遮。」
7
大闢 講:「毋免驚。我一定欲因為你的老父 約拿單 的緣故好款待你,將你的阿公 掃羅 的田園攏還你,嘛欲互你常常及我做夥食。」
8
米非波設 閣仆啲拜伊,講:「你的僕人算什麼?我不過親像一隻死狗,你竟然按呢照顧我!」
9
王叫 掃羅 的僕人 洗巴 來,給伊講:「我已經將 掃羅 及伊家族所有的財產攏互你的主人的孫。
10
你及你的子、你的僕人著給伊種作,帶田園所出產的互你的主人的孫有物通食;你主人的孫 米非波設 會常常及我做夥食。」 洗巴 有十五個子、二十個僕人。
11
洗巴 對王講:「我的主我的王吩咐的,你的僕人攏會照按呢做。」 所以, 米非波設 就及王 做夥食,親像王的子仝款。
12
米非波設 有一個細漢子,叫做 米迦 。 洗巴 𪜶兜所有的人攏做 米非波設 的僕人。
13
米非波設 兩腳攏跛,住佇 耶路撒冷 ,常常及王做夥食。
Chinese TTVH 2021
The Bible Society in Taiwan, 2021
:
保存笔记