×

Ika Bible 2018

2 Samuẹlụ 9

1
Defidi sị, “O nwọnghọdẹ onyẹ rị ndụn ikpụlọ Sọlụ, kẹni m mẹn'ẹ ihiẹn run'ẹ rịkẹ onyẹ nke Jonatanị?”
2
O nwọn odibo Sọlụ ohu rịnị hụn ẹfan a wụ Ziba. Wẹ nọ kpọ a d'a hụn eze wụ Defidi; eze nọ sị a, “Ịyụ wụ Ziba?” Ọ nọ sị a, “Mmẹ odibo i rọ.”
3
Eze nọ sị a, “Onwọnni onyẹ họdụ ikpụlọ Sọlụ, hụn m k'e mẹni ọhụnma Chuku?” Ziba nọ sị a, “O nwọnghọ okẹnnyẹ ohu họdụnị imẹ ụmụ Jonatanị; ụkụ ẹbụbụọ nwụnhụn a.”
4
Eze nọ jụ a sị, “Ebe ọ rị?” Ziba nọ sị a, “Ọ rị iwe Makiri nwa Amiẹlụ imẹ Lo-Dẹba.”
5
Ya Eze wụ Defidi nọ zi wẹ, wẹ nọ gha iwe Makiri nwa Amiẹlụ rị Lo-Dẹba welụa a.
6
Ogẹn Mẹfiboshẹti nwa Jonatanị nwa Sọlụ gi ru ebe Defidi rị, ọ nọ hulụa isi gbaye ẹ. Defidi nọ sị, “Mẹfiboshẹti!!” Ọ nọ sị, “E lee m mmẹ odibo i.”
7
Defidi nọ sị a, “Atụlẹ egun, m jẹnkọ d'e mẹ i kẹ onyẹ nke m makẹ Jonatanị nẹdi i. M k'e yekinchanrịn ị alị nẹdi i kanị wụ Sọlụ; ị k'a gha e sọn m e ri ihiẹn ogẹn ile.”
8
Mẹfiboshẹti nọ hulụa isi, sị, “Kịnị kẹ mmẹ wụ odibo i wụ i gi lepụha nkitẹ nwụnhụnnị nọkẹ mmẹ?”
9
Ya eze nọ kpọ Ziba, odibo Sọlụ, sị a, “E wegụọ m nwan ihiẹn ile wụ nke Sọlụ di-nwọnni i lẹ ikpụlọ a ye Mẹfiboshẹti nwa-nwa a.
10
Ịyụ lẹ ụmụ ị lẹ idibo i k'a gha a rụnnị Mẹfiboshẹti alị ndị hụ, e welụa ihiẹn ụnụ rụnpụha, nị nwa-nwa di-nwọnni i hụn ụzọ e nwọnhẹn ihiẹn o gi e bi. Mẹfiboshẹti nkẹ k'a gha e sọn m e ri ihiẹn-oriri.” (Ziba nwọn ụmụ-ikẹnnyẹ mmisẹn lẹ idibo ọgụn.)
11
Ya Ziba nọ sị eze, “Mmẹ wụ odibo i k'e mẹ ihiẹn ọwụlẹ eze nwọnni m sị odibo ẹ mẹ.” Ya Mẹfiboshẹti nọ rimẹ ihiẹn-oriri ebe Defidi nọ e ri, rịkẹ nwa eze.
12
Mẹfiboshẹti mụ nwata okẹnnyẹ ohu ẹfan a wụ Mika. Ụhụọhịn ahụn kẹ ndị ile rị ezi-lẹ-ụlọ Ziba họnrin idibo Mẹfiboshẹti.
13
Mẹfiboshẹti nọ biri imẹ Jerusalẹm, makẹni ebe eze nọ e ri ihiẹn-oriri kẹ ịya nwẹn nọ e ri ogẹn ile. Ụkụ ẹbụbụọ nwụnhụn Mẹfiboshẹti.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes