Unya si Hari Solomon nahigugma sa daghang mga babaye nga langyaw uban sa anak nga babaye sa Paraon: mga Moabihanon, mga Amonihanon, mga Edomhanon, mga Sidonhanon ug mga Hitihanon,
Sa mga nasod nga giingon sa Ginoo ngadto sa katawhan sa Israel, “Dili kamo makigminyo kanila, mao man usab sila nganha kaninyo kay, sa pagkatinuod sila magpasimang sa inyong kasingkasing sa pagsunod sa ilang mga dios.” Apan si Solomon nahigugma kanila pag-ayo.
Kay sa diha nga si Solomon natigulang na, ang iyang mga asawa nakapasimang sa iyang kasingkasing sa pagsimba sa laing mga dios ug ang iyang kasingkasing wala magmatinud-anon sa Ginoo nga iyang Dios, sama sa kasingkasing ni David nga iyang amahan.
Unya si Solomon nagtukod ug usa ka habog nga dapit alang kang Camos, ang dulumtanan diha sa Moab, ug alang kang Molec, ang dulumtanan diha sa mga Amonihanon, didto sa bungtod sa silangang dapit sa Jerusalem.
Busa ang Ginoo miingon kang Solomon, “Tungod kay kini mao ang imong hunahuna ug wala nimo tumana ang akong kasabotan ug ang akong mga lagda nga akong gisugo kanimo, langkaton gayod nako ang gingharian gikan kanimo ug ihatag nako kini sa imong sulugoon.
Hinuon dili nako langkaton ang tibuok gingharian, apan akong ihatag ang usa ka banay ngadto sa imong anak, tungod ug alang kang David nga akong sulugoon, ug tungod ug alang sa Jerusalem nga akong gipili.”
Kay sa diha nga si David didto sa Edom, ug si Joab, ang tigmando sa kasundalohan mitungas aron sa paglubong sa gipamatay, iyang gipatay ang tanang lalaki sa Edom,
Migikan sila sa Midian ug miadto sa Paran ug nagkuha sila ug mga tawo gikan sa Paran ug nangadto sa Ehipto, ngadto sa Paraon nga mihatag kaniya ug usa ka balay ug naghatag kaniya ug mga pagkaon ug mihatag kaniya ug yuta.
Ug si Hadad gikahimut-an sa Paraon, mao nga iyang gihatag kaniya nga mahimong asawa ang igsoon sa iyang asawa, ang igsoon nga babaye ni Tapenes nga rayna.
Ug ang igsoon nga babaye ni Tapenes nanganak ug batang lalaki nga si Genubat, nga gilutas ni Tapenes sa balay sa Paraon. Si Genubat diha sa balay sa Paraon ipon sa mga anak sa Paraon.
Apan sa pagkadungog ni Hadad didto sa Ehipto nga si David mipahulay na uban sa iyang katingulangan ug nga si Joab nga tigmando sa kasundalohan patay na, si Hadad miingon sa Paraon, “Pagikana ako karon aron makaadto ako sa akong kaugalingong nasod.”
Apan ang Paraon miingon kaniya, “Unsay nakulang nimo uban kanako nga nagtinguha man ikaw sa pag-adto sa imong kaugalingong yuta?” Ug siya miingon, “Wala, apan pagikana lamang ako.”
Ug ang Dios naghatag usab kang Solomon ug laing kaaway, si Rezon nga anak ni Eliada, nga mikagiw gikan sa iyang agalon nga si Hadadeser nga hari sa Zoba.
Ug nagtigom siya ug mga tawo ngadto kaniya ug nahimo siyang pangulo sa maong panon, human sa pagpamatay ni David, ug nangadto sila sa Damasco ug mipuyo didto ug gihimo siyang hari sa Damasco.
Si Jeroboam nga anak nga lalaki ni Nebat, usa ka Efraimhanon sa Zereda, usa ka sulugoon ni Solomon, nga ang inahan ginganlan ug si Zeruia, usa ka biyuda, mipataas usab sa iyang kamot batok sa hari.
Ug mao kini ang hinungdan ngano nga gipataas niya ang iyang kamot batok sa hari: gitukod ni Solomon ang Millo, ug giayo ang naguba nga bahin nga kuta sa siyudad ni David nga iyang amahan.
Si Jeroboam usa ka tawo nga may katakos ug sa diha nga nakita ni Solomon ang batan-ong lalaki nga siya kugihan, gipiyalan siya sa pagdumala sa tanang pinugos nga trabaho sa banay ni Jose.
Ug niadtong panahona, sa diha nga si Jeroboam migula sa Jerusalem, ang propeta nga si Ahias nga taga-Silo nakatagbo kaniya diha sa dalan. Si Ahias nagsul-ob ug usa ka bag-ong bisti ug sila lamang duha ang diha sa kapatagan.
Ug siya miingon kang Jeroboam, “Pagkuha alang sa imong kaugalingon ug napulo ka bahin kay mao kini ang gipamulong sa Ginoo, ang Dios sa Israel, ‘Tan-awa, langkaton na nako ang gingharian gikan sa kamot ni Solomon ug maghatag kanimo ug napulo ka banay,
apan usa ka banay ang maiya tungod ug alang sa akong sulugoon nga si David ug tungod ug alang sa Jerusalem, ang siyudad nga akong gipili gikan sa tanang banay sa Israel,
tungod kay ila akong gitalikdan, ug nagsimba sila kang Astarot nga diosa sa mga Sidonhanon, kang Camos nga dios sa Moab ug kang Milcom nga dios sa mga Amonihanon, ug wala sila maglakaw sa akong mga dalan, sa pagbuhat sa matarong diha sa akong panan-aw ug sa pagtuman sa akong mga lagda ug sa akong mga tulumanon, sama sa gihimo ni David nga iyang amahan.
Apan dili nako kuhaon ang tibuok gingharian gikan sa iyang kamot, hinuon himoon nako siya nga hari sa tanang adlaw sa iyang kinabuhi tungod ug alang kang David nga akong sulugoon nga akong gipili, nga nagtuman sa akong mga sugo ug sa akong mga lagda.
Ug sa iyang anak ihatag nako ang usa ka banay aron si David nga akong sulugoon makabaton ug usa ka lampara sa akong atubangan diha sa Jerusalem, ang siyudad nga akong gipili nga butangan sa akong ngalan.
Ug kon ikaw mamati sa tanan nga akong gisugo kanimo ug maglakaw sa akong mga dalan ug magbuhat sa matarong diha sa akong mga mata, sa pagtuman sa akong mga lagda ug sa akong mga sugo sama sa gihimo ni David nga akong sulugoon, ako mag-uban kanimo ug magtukod kanimo ug usa ka balay nga lig-on, ingon nga ako nagtukod alang kang David, ug ihatag nako ang Israel kanimo.
Busa si Solomon naninguha sa pagpatay kang Jeroboam, apan si Jeroboam mitindog ug mikagiw ngadto sa Ehipto, ngadto kang Sisak nga hari sa Ehipto, ug nagpabilin didto sa Ehipto hangtod nga namatay si Solomon.
Ug si Solomon mipahulay uban sa iyang katigulangan ug gilubong diha sa siyudad ni David nga iyang amahan, ug si Rehoboam nga iyang anak naghari puli kaniya.