Ikorọbịa hụ ya lẹ wẹ gba sue nọ sị a, “Ihiẹn i jẹnkọ d'a shịarị ndị ahụn sị ị, ‘Nẹdi i bu okẹn ibu che ẹnyi olu; mẹ nwan n'ọ rịnị ẹnyi nfe,’ wụ ọnwan: ‘Mkpịnsịn-ẹka nta m kadẹ ukun nẹdi m.
weri ndụnmọdụn ikorọbịa: ọ sị ndị Izrẹlụ, “Nẹdi m buye ụnụ ibu nyịnnị; m k'e buzidẹ ibu chen'ẹ! Nẹdi m gi mkpịnsịn mmaka sọn ụnụ; akpị kẹ mmẹ nwẹn k'e gi sọn ụnụ!!”
Mgbe ndị Izrẹlụ ile gi hụn a nị eze ekweni gọn wẹ ntịn, wẹ nọ sị eze: “Elee hụn wụdẹ nwan nke ẹnyi imẹ ẹbozo Defidi? Onwọnni hụn ru ẹnyi imẹ nwa Jese. A la nị iwe ụnụ, ndị Izrẹlụ! Ẹbozo Defidi, lepụma nị iwe ụnụ ẹnya!” Ya kẹ ndị Izrẹlụ nọ la iwe wẹ.
O mẹgụ, eze wụ Rehobụam nọ zi Adoram (Adoniram) hụn a kị ndị wẹ waye ọrụn olu d'e kunrun ndị Izrẹlụ. Izrẹlụ ile nọ gi ọmụma magbu ẹ kanị eze lẹ enwẹn a hụnghọ isi ban ụgbọ-ẹshin, gbashi Jerusalẹm.
Mgbe ndị Izrẹlụ ile gi nụ nị Jerobụam a lụahagụọ, wẹ nọ zu ọgwa, zi wẹ d'a kpọ a, ya wẹ nọ kin ẹ eze Izrẹlụ ile. Onwọnni ndị ọzọ nọyeni ikpụlọ Defidi mmanị ebọn Juda sụọ.
‘Lee ni ihiẹn Osolobuẹ ku: Ejẹnkwọlẹ ni d'a maye umunẹ ụnụ ndị Izrẹlụ ọgụn. Onyẹ ọwụlẹ ya la iwe ẹ, makẹni mmẹ rị e mẹ ihiẹnni.’ ” Ya wẹ nọ gi oku Osolobuẹ dọn, lama iwe wẹ kẹ Osolobuẹ dọn ku.
Jerobụam hụn rị a kị Izrẹlụ Ẹbamịn-ugu nọ dọnzi obodo Shẹkẹm hụn rị elu ugu Ifrem, biri ebẹhụ, a kị. Omẹgụ, ọ nọ gha ebẹhụ pụ d'a tụndọnzi obodo Pẹniẹlụ.
Eze a jụgụ ndị ọ jụ uche wẹ, ọ nọ gi goru kpụ ụmụ-efin ẹbụọ. Ọ sị ndị ọ rị a kị, “Jerusalẹm e tekẹzi ụnụ e jẹn. Ndị Izrẹlụ, lee ni mmọn ụnụ, hụn gha alị Ijiptu wepụha ụnụ!”
Jerobụam nọzịkwọ tụnsọnmẹ ụlọ-mmọn ye ebe jẹn elu, e tumẹsọnmẹ onyẹ ọwụlẹ ọ hụn n'ọ wụrụ ohẹn-mmọn, a chụn ẹjan, ọsụọn'a nị ẹlẹ wẹ ndị Livaị, ndị hụn Osolobuẹ ye ọrụn ndị nchụn-ẹjan.
Eze wụ Jerobụam nọ tumẹ mmẹmmẹ wẹ jẹnkọ d'a gha e mẹ nke akp'ọhịn mmisẹn imẹ ifọn nke ẹsatọ, nọkẹ mmẹmmẹ hụ w'e mẹ azụụn hụn ẹbọ wụ Juda. Ọ chụnsọnmẹ ẹjan elu ukpo nchụn-ẹjan hụ. Ihiẹnni k'o mẹ imẹ obodo Bẹtẹlụ, ọ chụnyeni ụmụ-efin ndị hụ ọ kpụ ẹjan. O tumẹsọnmẹzikwọ ndị o tumẹ ohẹn mmọn buche ụlọ-mmọn ndị hụ ọ rụnsọnmẹ ebe rị ichẹn-ichẹn jẹn elu imẹ Bẹtẹlụ.
O ru nwan nke akp'ọhịn mmisẹn imẹ ifọn nke ẹsatọ hụ, ifọn ahụn o gi ẹka a tumẹ, ọ nọ chụn ẹjan elu ukpo nchụn-ẹjan hụ ọ rụn imẹ Bẹtẹlụ. O tumẹgụọnị ndị Izrẹlụ rị azụụn nke ẹ mmẹmmẹ wẹ k'a gha e mẹ, o nyinrin ukpo nchụn-ẹjan hụ d'a chụn ẹjan.