Kom-bɩɩbã, a reem-n-taasã leokame: «Ad-y y sẽn na n leok sẽn yeel-b yãmb woto wã: ‹Y ba zɩlga tõnd wʋsgo, la yãmba, yols-y-do,› leok-y woto: ‹M pãnga sẽn tɩ paoog-m zĩig ninga ket n yɩɩda y ba wã pãng sẽn tɩ tigim zãng-zãng a nugẽ.
Yaa a reem-n-taasa la a kelg yã. Ad-a sẽn yeele: «M ba tʋka yãmb sẽn zɩse, la mam na paas y zɩɩbo, m ba pãb-y la ne kaase, la mam na pãb-y ne gãnd sẽn yod kutu.»
Neba sẽn mik tɩ dĩma pa kelg-bã, b leokame: «D pʋɩɩr bʋgo n be ne a Daviid? Tõnd pʋɩɩr ka be a Zese biig nugẽ ye. Israyɛl, leb f rotẽ. Daviid doogo, bãng n dɩlg f menga.» A Israyɛl leba a tẽnsẽ.
A Roboam tʋlg n maneg n yẽsa ne Israyɛl nebã la yẽ sẽn tʋm b nengẽ, a Adoram, a tʋʋma gɛta, rẽ puuga b sũur tɩ b lab-a ne kug n kʋ. A Roboam paam n kẽ-la a bilim-bilm n zoe n tees Zerizalɛɛm.
Israyɛl rãmba sẽn wʋm t'a Zeroboam lɛɛg n waame, b bool-a-la b tigsga zĩigẽ n yug-a t'a lebg Israyɛl dĩma. Woto a Zɩɩda ne a Bẽnzame bala n kell n pa a Daviid rooga naamẽ.
A Roboam waa Zerizalɛɛm, n tigim a Zɩɩda ne a Bẽnzame tãb-biis sẽn mi zabre, bãmb tus koabg la pis-nii, n na n tɩ tak zabr ne a Israyɛl, n deeg naama n lebs a Roboam, a Salomo biigã.
‹Woto la Soaala koɛɛga: Da bob-y zabre ne y saam-biis a Israyɛl kamb ye. Ned kam fãa leb a yiri, tɩ sẽn maana zemsa ne mam daabo.› » B kelga Soaala-Wẽnd gomdã, la wala Soaala sẽn wilgã, b rɩka sore n leb b tẽnsẽ.
A paama yam n maan sãnem nag-bi a yiibu n yeel zãma wã: «Yaa yʋʋm sẽn ka paood la yãmb tʋgd Zerizalɛɛm. La ade, Israyɛl, ad wẽnd niyns sẽn yiis-b-foo Ezipt tẽnga!»
A Zeroboam maana kibsa, kiuug a nii soaba, kiuuga piig la a nu daare, wala b sẽn da maand Zɩɩda. A meng dʋʋ maan-kugra sẽn me tãng ning zugã; yaa woto la a maan Betɛl, n kʋʋd a nag-bi wã maando, n ningd maan-kʋʋdba, tãmsa zut maanda kʋʋb yĩnga.
Kiuug a nii soaba, kiuuga piig la a nu daare, raar a sẽn yãk wa sẽn waa a yamẽ, a dʋ Betɛl maan-kugra, tãnga zugu. A maana kibs Israyɛl kamba yĩnga la a rʋʋ maan-kugrã n yõog wisdu.