Ndipo mneneriyo adatemberera guwalo potsata mau a Chauta nati, “Guwa iwe, guwa iwe, imva mau a Chauta, akunena kuti, ‘Mwana wamwamuna adzabadwa pa banja la Davide, dzina lake Yosiya. Pa iwe iyeyo adzaperekapo ngati nsembe ansembe otumikira ku malo achipembedzo amene amafukiza lubani pa iwe, ndipo pa iwe adzatenthapo mafupa a anthu.’ ”
Mfumu Yerobowamu atamva zimene ankanena mneneri wa Mulungu zija za guwa la ku Betele, adatambalitsa dzanja lake ali kuguwako nati, “Mgwireni.” Pomwepo dzanja lake lomwe adaatambalitsira mneneri wa Mulungu lija lidauma kuti gwa, ndipo sadathenso kulibweza.
Apo mfumu idauza mneneri wa Mulungu uja kuti, “Mupemphere kwa Chauta Mulungu wanu kuti andikomere mtima, dzanja langali lichire.” Mneneri wa Mulungu adapemphera kwa Chauta, ndipo dzanja la mfumu lidachiradi.
Tsono ku Betele kunkakhala mneneri wina wokalamba. Ana ake adadza kudzamuuza zonse zimene mneneri wa Mulungu adaachita ku Betele tsiku lija. Adauzanso atate ao mau onse amene mneneri wa Mulungu uja adaauza mfumu.
ndipo iyeyo adafuulira mneneri wa Mulungu, wochokera ku Yuda uja kuti, “Imvani mau a Chauta, akuti chifukwa choti simudamvere mau a Chauta, ndipo simudatsate lamulo lake limene adakulamulani,
koma mwabwerera, ndipo mwadya ndi kumwa madzi pa malo amene Chauta adakuuzani kuti musakadye chakudya kapena kumwako madzi, mtembo wanu sadzauika m'manda a makolo anu.”
Mneneri amene adaabweza mnzake kunjira uja, atamva zimenezo, adati, “Ameneyo ndi mneneri wa Mulungu uja amene sadamvere mau a Chauta. Nchifukwa chake Chauta wampereka kwa mkango, umene wamkadzula ndi kumupha, monga momwe Chauta adaanenera.”
Mneneri wokalambayo adatenga mtembo wa mneneri wa Mulungu uja, nauika pa buluyo, ndipo adabwera nawo ku mzinda kuti alire maliro ndi kuika mtembowo m'manda.
Zoonadi, zimene Chauta adalankhulitsa mneneriyo zotemberera guwa la ku Betele ndi nyumba za pa malo achipembedzo zimene zili m'mizinda ya ku Samariya, zidzachitikadi.”
Ngakhale zidaatero, Yerobowamu sadasiye njira zake zoipa, koma adaikanso anthu wamba kukhala ansembe pa malo akeake achipembedzo. Aliyense amene ankafuna, adampatula kuti akhale wansembe wa pa malowo.