Bisan pa niini tungod kang David ang Ginoo naghatag kaniya ug usa ka anak nga lalaki aron maoy mopuli kaniya paghari didto sa Jerusalem ug aron ang Jerusalem mahilayo sa kadaot.
Gihimo kini sa Ginoo kay gibuhat man ni David ang matarong ug gituman niya sa tibuok niyang kinabuhi ang tanan nga gisugo kaniya sa Ginoo gawas sa butang nga may kalabotan kang Urias nga Hitihanon.
Gihinginlan niya ang pundok sa mga lalaki nga nagbaligya sa ilang dungog. Gikuha usab niya ang tanang diosdios nga gibuhat sa uban niyang katigulangan.
Gipapahawa usab niya ang iyang apohan nga si Maaca sa pagkarayna kay nagbaton man siyag law-ay nga larawan sa diosdios nga si Asera. Gikuha ni Asa ang larawan ug gisunog niya kini didto sa Sapa sa Kidron.
Ug gidala niya ngadto sa Templo sa Ginoo ang mga gasa nga gihalad sa iyang amahan ngadto sa Dios ingon man ang mga galamiton nga plata ug bulawan nga iyang gihalad.
Unya gikuha ni Asa ang tanang plata ug ang bulawan nga nahibilin diha sa panudlanan sa Templo sa Ginoo ug ang mga bahandi sa palasyo ug gihatag niya kini ngadto sa iyang mga sulugoon. Gipadala kini ni Hari Asa ngadto sa hari sa Siria nga si Benadad, anak ni Tabremon ug apo ni Hezion nga nagpuyo didto sa Damasco. Si Asa miingon,
“Maghiusa kitang duha sama sa gihimo sa atong mga amahan. Nagpadala ako kanimog mga gasa nga plata ug bulawan. Ayaw na pagpakig-abin kang Baasa nga hari sa Israel aron moundang siya sa pagpakiggubat kanako.”
Miuyon si Benadad sa hangyo ni Asa ug gipasulong niya sa iyang mga kasundalohan ang mga siyudad sa Israel. Nailog nila ang Ahion, Dan, Abelbet Maaca, ang yuta duol sa Lanaw sa Galilea uban sa tibuok yuta sa Neftali.
Unya si Hari Asa nagpakanaog ug sugo ngadto sa tibuok Juda nga kuhaon nila ang mga bato ug mga troso gikan sa Rama nga gigamit ni Baasa sa pagpanalipod unta sa Rama ug gigamit niya kini sa pagpanalipod sa Geba sa yuta sa Benjamin ug sa Mispa.
Ang tanang nabuhat ni Asa, ang iyang nahimo sa panggubatan ug ang mga lungsod nga iyang gihimoan ug mga kota nahisulat sa Kasaysayan sa mga Hari sa Juda. Apan sa pagkatigulang na niya may sakit siya diha sa iyang mga tiil.
Si Baasa nga anak ni Ahias sa banay ni Isacar naglarawg daotan batok kang Nadab. Samtang gilibotan ni Nadab ug sa iyang kasundalohan ang siyudad sa Gibeton nga iya sa mga Filistihanon, gipatay siya ni Baasa.
Sa pagkahari na niya, gipatay niya ang tanang sakop sa banay ni Jeroboam sumala sa pulong sa Ginoo nga gisulti niya pinaagi sa iyang alagad nga si Ahias nga taga-Silo.
Sa ikatulong tuig sa paghari ni Asa sa Juda, si Baasa nga anak ni Ahias nagsugod sa paghari sa tibuok Israel didto sa Tirza ug naghari siya sulod sa 24 ka tuig.