La baasg zãnga, a saamba, a Daviid, zug maasem yĩnga, Soaala-Wẽnnaam ka bas tɩ b fitila ki Zerizalɛɛm ye; b kõ-a-la biig sẽn dɩ naam a poorẽ; Zerizalɛɛm kell n yɩɩ na-tẽnga.
A Asa kong n wʋka wanzurf la sãnema fãa sẽn da kell Wẽnd arzɛka roogẽ la dĩma arzɛka roogẽ n ning a sõgen-kamba nusẽ tɩ b kẽng Damas n tɩ kɩs Siri dĩm, a Ben-Adad, a Tabrimo biiga la a Eziõ yagenga, la b taas-a woto:
«Maam ne yãmb, mam saamba ne yãmb saamba, yaa zoodo. Ad-y m toonda yãmb kũuni, wanzurfu la sãnem. Bɩ y bas tɩ zooda sẽn be yãmb ne Israyɛl dĩm a Basa sʋka sãame t'a ra le wat n takd zabr ne-m ye.»
A Ben-Adad kelga a Asa koɛɛgã, n tʋm a tãnsoaben-dãmba tɩ b tak zabre ne Israyɛl tẽnse. A reega Iyõ, Dã, Abɛl-Bɛt-Maaka, Kinerɛt tẽng gilli, la Neftali zãnga.
A Asa, Zɩɩda dĩma, boola Zɩɩda gilli n ka bas ned ba a yembre, la b tɩ wʋka kuga la raado b sẽn da tigsi n met Rama, la dĩma rɩk-b la lame n me Gibea, a Bẽnzame soolmẽ, la Mispa.
A Asa kibara zãnga, a raoodã, a tʋʋma, rẽ fãa pa gʋls a Zɩɩda dĩm dãmba kibara sebrẽ bɩ? B sẽn pa wilgi yaa a sẽn n waa n lebg nin-kẽema n bẽed nao bãaga.
La a Basa, a Ayiya biiga, a Isakar roogẽ, n zãmb-a. A Basa kʋ-la a Nadab Gibetõ, Filisti rãmba soolmẽ; wakat kãng t'a Nadab ne a Israyɛl gilli da gũbga Gibetõ.
A sẽn lebg dĩm bala, a Basa wã-la a Zeroboam doog gilli. Ned ba a ye ka põse, wala Wẽnd sẽn da pĩnd n yeel ne b bãngda, a Ayiya, noore. Bãngda da yaa Silo raoa.