Ida Sang Hyang Widi Wasa tumuli masabda ring Nabi Yehu, okan Dane Hanani, mangda dane ngrauhang sabdan Idane ring Ida Sang Prabu Baesa, kadi asapuniki:
“Sujatinne kita tan paji, nanging Ulun nadiang kita pamimpin kaulan Ulune Israel. Nanging ane jani kita suba madosa patuh buka Yerobeam, buina suba nuntun kaulan Ulune malaksana dosa. Dosa-dosannyane suba ngranayang Ulun duka.
Sabdan Ida Sang Hyang Widi Wasa sane tumiba ring Ida Sang Prabu Baesa miwah kulawargan idane, sampun karauhang antuk dane Nabi Yehu, santukan ida sang prabu sampun ngardi dosa pamantuka ring Ida Sang Hyang Widi Wasa. Ida sampun ngawinang Ida Sang Hyang Widi Wasa duka, boyaja wantah malantaran kajaatan sane laksanayang ida, sane pateh sakadi sane sampun kalaksanayang antuk Ida Sang Prabu Yerobeam sane riinan ring ida, nanging taler malantaran ida sampun nyedayang sakancan kulawargan Ida Sang Prabu Yerobeam.
Ring taun sane kaping nemlikur sapanyeneng Ida Sang Prabu Asa ring Yehuda, Ida Sang Prabu Ela putran Ida Sang Prabu Baesa madeg ratu ring Israel, tur ida mrentah ring Tirsa kalih taun suenipun.
Dane Simri salah tunggil senapatin idane, sane ngamong pasukan kretan idane atenga, raris mapacukan jaga nglawan ida. Sedek rahina anu, duk Ida Sang Prabu Ela sedekan mainum-inuman kantos punyah ring Tirsa, ring jeroan Dane Arsa, sane dados pangenter purin idane,
Dane Simri raris ngranjing ka jeroane punika, tumuli nyedayang Ida Sang Prabu Ela, raris ngentosin ida jumeneng ratu. Indike punika kamargiang ring taun sane kaping pitulikur, panyeneng Ida Sang Prabu Asa ring Yehuda.
Sasampun Ida Sang Prabu Simri madeg ratu, ida raris nyedayang sawatek kulawargan Ida Sang Prabu Baesa. Sawatek kadang warga miwah parasawitran idane sane lanang-lanang, makasami kasedayang.
Kadi asapunika indiknya Ida Sang Prabu Simri nyedayang sakancan kulawargan Ida Sang Prabu Baesa, satinut ring sabdan Ida Sang Hyang Widi Wasa, sane sampun kasabdayang tumiba ring Ida Sang Prabu Baesa, malantaran dane Nabi Yehu.
Santukan ida sampun nyungsung dewa-dewa miwah ida sampun nuntun wong Israele malaksana dosa, Ida Sang Prabu Baesa miwah putran idane Sang Prabu Ela, sampun ngawinang Ida Sang Hyang Widi Wasa, Widin Israele duka.
Ring taun sane kaping pitulikur, panyeneng Ida Sang Prabu Asa ring Yehuda, Ida Simri madeg ratu ring Tirsa, mrentah wong Israele pitung rahina suenipun. Duk punika wadua balan Israele sedek ngurung kota Gibetone ring wewidangan wong Pilistine.
Daweg punika wadua balane taler miragi, mungguing Ida Simri sampun mapiguman buat nglawan Ida Sang Prabu Ela, tur sampun nyedayang ida. Duaning punika wadua balane sami raris ngadegang Dane Omri, senapatin wadua balane dados ratun Israele.
Rikala Ida Simri nyingak mungguing kotane sampun kakaonang, ida raris ngranjing ka benteng purine tumuli nunjel purine punika, tur ida ngraga taler seda mageseng irika.
Indike punika mamargi kadi asapunika, malantaran dosa-dosan idane pamantuka ring Ida Sang Hyang Widi Wasa. Pateh sakadi Sang Prabu Yerobeam sane riinan ring ida, ida taler ngardi paindikan sane tan ngledangin Ida Sang Hyang Widi Wasa malantaran dosan idane ngraga miwah malantaran ida nuntun wong Israele malaksana dosa.
Duk punika wong Israele pada maruang-ruangan, wenten sane mamanah ngadegang Dane Tibni, okan Dane Ginat, jaga dados ratu, tur sane lianan kantun ngamanggehang Dane Omri.
Duaning punika rikala taun sane kaping tigang dasa siki, panyeneng Ida Sang Prabu Asa ring Yehuda, Ida Sang Prabu Omri madeg ring Israel, tur ida mrentah roras taun suenipun. Pangawitipun ida mrentah ring Tirsa nem taun suenipun.
Sasampune punika ida raris numbas pagunungan Samariane saking anak sane mawasta Semer, mapangarga aji nem tali bidang jinah perak. Ida raris ngwangun kota miwah benteng ring pagunungane punika tur kotane punika raris kawastanin Samaria, manut wastan I Semer, sane pecak nerbeang pagunungane punika.
Pateh sakadi Sang Prabu Yerobeam sane riinan ring ida, ida ngawinang Ida Sang Hyang Widi Wasa, Widin Israele duka malantaran dosa-dosan idane, miwah malantaran ida nuntun wong Israele malaksana dosa miwah nyungsung arca-arca.
Ring taun sane kaping tigang dasa kutus, panyeneng Ida Sang Prabu Asa ring Yehuda, Ida Sang Prabu Akab putran Ida Sang Prabu Omri madeg ratu ring Israel tur ida mrentah ring Samaria kalih likur taun suenipun.
Ida ngardi dosa langkungan ring Ida Sang Prabu Yerobeam. Nanging langkungan malih ring punika, ida marabian sareng Ida Isebel, okan Ida Sang Prabu Etbaal saking Sidon, tur nyungsung Dewa Baal.
Ida taler makarya arca Dewi Asera. Ida ngardi paindika-paindikan sane ngawinang Ida Sang Hyang Widi Wasa, Widin Israele, bangetan duka ring ida bandingang ring sakancan pararatun Israele sane riinan ring ida.
Duk panyeneng idane, Dane Hiel sane saking Betel raris ngwangun kota Yerikone. Rikala Dane Hiel masang dasar, dane macaru antuk okan danene sane pinih duur sane mapesengan Abiram, tur rikala dane ngwangun gapuran kotane, dane macaru antuk okan danene sane pinih alit, sane mapesengan Segub. Indike punika satinut ring sabdan Ida Sang Hyang Widi Wasa sane sabdayang Ida sane riin malantaran Dane Yosua okan Dane Nun.