Ko u ye kiatororin imong’une temburiek, ak ayain iegu bounindetab bikyuk Israel; ak koiwendote ortinwekab Jeroboam, ak koigochi bikyuk koyai tengekto, kotacha eng’ tengekwogikwak anerech:
Ak kichaam inendet otwogindennyi Simri, kiptaiyatab kebebertab karisiekyik: kimi Tirsa, koeeisei kot ko kiga kobogit eng’ gotab Arsa, ne kibou got eng’ Tirsa:
Ak kingotoi kolaitoran, ko kata kotebe ng’echerennyi ne bo laitornatet, kobar gotab Basa tugul: ma ituukyi inendet lakwet agot agenge ne werit, anan ko ne bo tilionutikyik, anan ko ne bo choronokyik.
Amu tengekwogik tugul che bo Baasa, ak tengekwogikab Ela werinnyi, che kiyai, che kiibeete Israel si koyai tengekto, kotach Jehovah Kamuktaindetab Israel konerech, eng’ boisionikwak che bo buch.
Kilaitoran Simri betusiek tisab eng’ Tirsa, eng’ kenyitab tiptem ak tisab, ne bo Asa laitoriatab Juda. Ak kiga teech bik kotokyingei Gibeton, ne ki bo Pilistik.
amu tengekwogikyik che kiyai, koyai yaitiet eng’ taitab Jehovah, kowendate ortinwekab Jeroboam, ak tengektanyi ne kiyai, kobeete Israel si koyai tengekto.
Kitoi Omri kolaitoran eng’ Israel eng’ kenyitab sosom ak agenge ne bo Asa laitoriatab Juda, ak kilaitoran kenyisiek taman ak aeng’: kilaitoran kenyisiek lo eng’ Tirsa.
Ak kial tulwetab Samaria ne bo Semer eng’ talentaisiek aeng’ che bo feda; ak kiteech tulwonoto, ak komwaitae kainetab nganaset ne kiga teech, kainetab Semer, chito ne ki bo tulwonoto bo Samaria.
Amu kiwendote ortinwek tugul che bo Jeroboam weritab Nebat, ak tengekwogikyik che kiibeete Israel si koyai tengekto, kotach Jehovah Kamuktaindetab Israel konerech, eng’ boisionikwak che bo buch.
Ak kitoi kolaitoran Ahab weritab Omri eng’ Israel, eng’ kenyitab sosom ak sisiit, ne bo Asa laitoriatab Juda: ak kilaitoran Ahab weritab Omri eng’ Israel eng’ Samaria kenyisiek tiptem ak aeng’.
Ak kiyai Ahab Asera; ak kiyai Ahab tuguk alak; kotes kotach Jehovah, Kamuktaindetab Israel, konerech, kosiir laitorinik tugul che bo Israel che kiindoune inendet.