Poisyonik che ng'etunotiin che po Baasha, tuguuk che ki yai ak kimnateennyi, koma siraatiin eng' kitabuutap ateptap peetuusyek ne po laitorinigap Israel?
Ki nyoonji `ng'olyootap Kamuktaindet ne Toroor kogeny maotyot Jehu weeriitap Hanani agobo Baasha ak koonnyi, amu yaityet tugul ne ki yai eng' taitap Kamuktaindet ne Toroor, kotach ineendet eng' poisyonigap eunekyik kot konereech, amu ki igei kootap Jeroboam ak amu ki par ineendet.
Kitau Elah weeriitap Baasha kolaitorani eng' Israel, eng' Tirzah; eng' kenyiitap tiptem ak lo ne po Asa laitoryatap Judah, ak ki laitoran kenyiisyek aeng'.
Kichaam ineendet otwogindennyi Shimri, kiptaiyatap kebebertap kariisyekyik. Ki mi Tirzah, koeisei kot ko kiga kobogit eng' kootap Arsa, ne ki pou koot eng' Tirzah.
Kingo toi kolaitoran, ko kata kotebee ng'echerennyi ne po laitornatet, kobar kootap Baasha tugul. Ma ituukyi ineendet lakweet agot agenge ne weeriit, ngo ne po tilyonutikyik anan ko ne po choronokyik.
Amu tengekwogik tugul che po Baasha, ak tengekwogigap Elah weeriinnyi, che ki yai, che ki ibeete Israel si koyai tengekto, kotach Kamuktaindet ne Toroor, Kamuktaindetap Israel konereech, eng' poisyonikwak che po puch.
Ki laitoran Shimri peetuusyek tisap eng' Tirzah, eng' kenyiitap tiptem ak tisap, ne po Asa laitoryatap Judah. Ak kiga teech piik kotokyingei Gibeton, ne ki po Philistik.
amu tengekwogikyik che ki yai, koyai yaityet eng' taitap Kamuktaindet ne Toroor, kowendate ortinwegap Jeroboam, ak tengektanyi ne ki yai, kobeete Israel si koyai tengekto.
Ki toi Omri kolaitoran eng' Israel eng' kenyiitap sosom ak agenge ne po Asa laitoryatap Judah, ak ki laitoran kenyiisyek taman ak aeng'. Ki laitoran kenyiisyek lo eng' Tirzah.
Ki al tulweetap Samaria ne po Semer eng' eliphuusyek lo che po fedha, ak ki teech nganaseet eng' tulwoonooto. Kiguure nganasanooto Samaria, komwaitae kainetap Semer, chiito ne ki po tulwoonooto.
Amu kiwendote ortinwek tugul che po Jeroboam weeriitap Nebat ak tengekwogikyik che ki ibeete Israel si koyai tengekto, kotach Kamuktaindet ne Toroor, Kamuktaindetap Israel konereech, eng' poisyonikwak che po puch.
Poisyonik che ng'etunotiin che po Omri che ki yai ak kimnateennyi ne ki iboor, koma kisir eng' kitabuutap ateptap peetuusyek ne po laitorinigap Israel?
Ki toi kolaitoran Ahab weeriitap Omri eng' Israel, eng' kenyiitap sosom ak sisiit, ne po Asa laitoryatap Judah. Ki laitoran Ahab weeriitap Omri eng' Israel eng' Samaria kenyiisyek tiptem ak aeng'.
Ki keer ineendet ko ki it ne ming'in kowendote tengekwogigap Jeroboam weeriitap Nebat ak kwo anyun kotun Jesebel cheptap Etbaal laitoryatap Sidonik, ak kwo koot Baal ak kogutung'ji.
Ki yai Ahab Asera ak ki yai tuguuk alak kotes kotach Kamuktaindet ne Toroor, Kamuktaindetap Israel, konereech, kosiir laitorinik tugul che po Israel che ki indoune ineendet.
Ki teech Hiel Bethelindet Jeriko eng' peetuusyekyik. Kilume lumeiywondennyi meetap Abiram taaitanyi, ak kolumda ormariichokyik eng' meetap weeriinnyi Segub toweennyi, ko uu ng'olyootap Kamuktaindet ne Toroor ne ki mwa eng' Joshua weeriitap Nun.