“Ɣän cä ji̱ kap nhial ni rɛy tupä kä cä ji̱ jak kä bo̱o̱th nɛɛnikä ni ji̱ I-thɛ-rɛl, kä ci guɔ̱ɔ̱r ni duɔ̱ɔ̱p Ya-rɔ-baam, kä ci nɛɛkä jak kä dui̱r, kä ci ɣä jak kä gak kɛ dueerkiɛn.
Kä cu ruac Kuɔth lɛni ben kä Yeɣu gat Ɣä-na-ni kɛ kui̱ Bɛ̈ca kɛnɛ dhɔrɛ, kɛ kui̱ lätnikɛ tin jiäk waaŋ Kuɔth Nhial kä cɛ jɛ jak kä gak, kɛ ɣöö ce̱t lätkɛ kɛ lät dhɔaar Ya-rɔ-baam, kɛnɛ ɣöö cɛ dhɔr Ya-rɔ-baam däk.
Duundɛ ɣöö cu raan kɔaarɛ ni Dhim-ri bo̱o̱th tha̱a̱ŋ thurbiɛɛlikɛ jɛ ca̱p mi jiääk, mëë tëë kä Ti̱r-dha. Yɔŋ ni jɛn kɛ kɔaŋ dhɔr Ar-dha, ti̱i̱t duëël kuäärä kä Ti̱r-dha.
Kɛ run ruëc Atha kuäär Juda ti jiɛn da̱ŋ rɛw wi̱cdɛ bärɔw, cu Dhim-ri ruëc kɛ ni̱n bärɔw kä Ti̱r-dha. Kä täämɛ ci rɛm pua̱t lotdä Gi-bɛ-thon, wec ji̱ Pi-li-thɛt,
Kä cuɛ päm Tha-mɛ-ria kɔk kä Cɛ-mɛr kɛ yio̱w ti bathdɔɔri bäkɛl. Kä cuɛ täth ɛn wec pa̱a̱m, kä cuɛ jɛ cɔli Tha-mɛ-ria, kɛ ciöt Cɛ-mɛr in la gua̱n pa̱a̱m.
Kä cuɛ guɔ̱ɔ̱r ni duɔ̱p Ya-rɔ-baam gat Nɛ-bat, kɛnɛ dueer tin cɛ I-thɛ-rɛl jak kä dui̱r, kä cɛ Kuoth Nhial Kuoth I-thɛ-rɛl jak kä gak kɛ kui̱ kuthnikiɛn.
Kä kɛ run rui̱cä Atha kuäär Juda ti jiɛn diɔ̱k wi̱cdɛ bädäk, cu Ɛ̈-ɣab gat Ɔmri a kuäär Kä I-thɛ-rɛl, kä cuɛ I-thɛ-rɛl ruac kä Tha-mɛ-ria kɛ run ti jiɛn da̱ŋ rɛw wi̱cdɛ rɛw.
Kä cuɛ ce̱tkɛ mi puɔl puɔl kä jɛ ɛn guur duɔ̱p Ya-rɔ-baam gat Nɛ-bat, kä cuɛ I-dhɛ-bɛl nya Ɛth-baal kuäär ji̱ Dhi-don kuɛn, kä cuɛ wä pal ni kuoth Baal.
Kɛ run ruëc Ɛ̈-ɣab, cu Ɣi-el raan Beth-ɛl rɛk Jɛ-ri-ko nyɔk kɛ ta̱th. Mëë tääthɛ pänydɛ cu gatdɛ min kɛ̱̈ɛ̱̈ ni Ä-bi-ram li̱w, kä mëë lätdɛ thi̱i̱kdɛ cu gatdɛ min tɔt ni Thɛ-gub li̱w, ce̱tnikɛ ruac Kuɔth Nhial ëë cɛ lat kɛ thok Jɔ-cua gat Nun.