Ben-hadad ruodh Aram nochoko ogandane mar lweny, kaachiel gi ruodhi piero adek gariyo gi farese kod geche lweny. Nodhi molworo Samaria, kendo nokedo kode mondo okawe.
Eka ruodh Israel noluongo jodongo duto mag piny, mowachonigi niya, “Koro neuru kaka ng’atni dwaro kelona masira. Ne ok atamora chiwo fetha gi dhahapa, to koro odwaro mondo amiye monda gi nyithinda bende!”
Omiyo nodwoko joote Ben-hadad niya, “Dhi unyis ruodha ni duto ma nokwongo kwaya, anatim, to gima koro okwaya sani ok anyal timo.” Mi joote nodwoko ni ruodhgi wach.
ka yawuowi ma lang jodong gwenge otelo nyime. To noyudo ka Ben-hadad mer e hembe, kaachiel gi ruodhi piero adek mane konye. Nokel ni Ben-hadad wach niya, “Jomoko wuok Samaria.”
Eka ichok oganda lweny moromo gi oganda ma nolalni, kiketo faras ka faras, kendo gari ka gari. Wanaked kodgi e pap, mi wanalogi adier.” Ben-hadad nowinjo wachgi motimo kamano.
Jo-Israel bende nochokore koseikgi ni lweny, mi ne giwuok mondo giked gi wasikgigo. Jo-Israel nojot momanyore gi jo-Aram. Jo-Aram nopong’o piny, to jo-Israel ne chalo kweth matindo ariyo mag diek.
Ng’at Nyasaye moro nodhi ir ruodh Israel, mowacho ne niya, “Ruoth Nyasaye owacho kama: ‘Jo-Aram osewacho ni Ruoth Nyasaye en nyasach gode, to ok en nyasach holni. Omiyo abiro chiwo oganda maduong’ni duto e lweti, eka unung’e ni an e Ruoth Nyasaye.’ ”
Ne gijot ka gimanyore kamano kuom ndalo abiriyo. Chieng’ mar abiriyo ne girado ni lweny, kendo odiechieng’no jo-Israel nonego jo-Aram alufu mia achiel.
Joma nodong’ noringo modonjo e dala Afek, to ohinga mar dala nopodho, monego ji alufu piero ariyo gabiriyo kuomgi. Ben-hadad bende noringo, modonjo e dalano, kendo nopondo ei ot moro maiye.
Jodonge nodhi ire, mowachone niya, “Wasewinjo ni ruodhi mag Israel ng’won. We mondo watue piende gugru e nungowa, kod tonde e ng’utwa, wadhi ir ruodh Israel, dipo koreso ngimani.”
Kuom mano, ne gitueyo piende gugru e nungogi, kod tonde e ng’utgi, mi gidhi ir ruodh Israel. Ne giwachone niya, “Ben-hadad jatichni osayi ni kik inege.” Ahab nopenjogi niya, “Kara, pod ongima? En owadwa.”
Noyudo ka jogo rito gima dinyisgi parone, omiyo ne giyiene mapiyo niya, “Adier, Ben-hadad en owadu.” Nowachonigi ni, “Dhiuru ukele ka.” Ben-hadad nodhi ir Ahab, mi Ahab noluonge mondo giidh kode gache.
Ben-hadad nowachone ni, “Abiro dwoko mier mane wuora omayo wuoru, kendo iniyud thuolo mar yawo kuonde ohala Damaski, kaka wuora notimo e dala Samaria.” Ahab nodwoke niya, “Abiro gonyi kiyie timo kamano.” Mi notimo kode winjruok, mogonye.
Kane ruoth kadho, jalo nokok kawachone ni, “Ruoth, ka nadonjo e chuny lweny, naromo gi jalweny moro mokelona ng’at motue, kowachona niya, ‘Rit ng’atni, to kapo ni olalni, to initho, kata in ichul kilo piero adek mag fedha.’
Nowacho ni ruoth niya, “Ruoth Nyasaye owacho kama: ‘Ng’at ma nyocha adwaro ni mondo otho, iseweyo odhi, omiyo ibiro tho kare, kendo jogi biro tho kar joge.’ ”