Kɑ jøgdøngi pödhø bënn cwööl yi Rɑ̈dh Akɑɑb, kɑ gï köbbe kinni, “Álidh yi wun, jɑɑl yɑb-ɑ ɑkørr. Áöni yïɑ cem e mɑ̈nnɑ geki nyigɑ womɑ̈nn, kí ngyëny ɑ́tegg geki dhɑb møgɑ di dwɑddø yi en. O ge nuti mɑ̈ɑ̈n yɑn en.”
Codhe, ɑköbbi jøg-ɑ ɑ́ör yi Benɑdɑd yi Akɑɑb kinni, “Köbbu wɑ̈ɑ rɑ̈dh kinni, yɑ ɑ́yïëy ki gïg-ɑ ɑ́kwøng yi en ki kwøbø, de yɑ pɑ cuggi yïëyø ki mø cyɑ̈n.” Jøgɑni ɑ́kedh kɑ ge cig-ɑ dwöögø këti ki wöödø megø,
kì yï Benɑdɑd kinni, “Yɑ óöni ki yɑy me dwøng me cøør kɑɑlɑni piny, tuggi udd-ɑ cøør gen piny ókɑ̈l yi gen kì cinggi gen. Wiy yɑ nɑ̈g yi jwögg keløg møgɑni pɑ gwøg yi yɑn.”
Benɑdɑd ɑ́yuud yi wööni Akɑɑb e omɑ̈dhø ki møgø kì thɑ̈thi ɑkɑnnì geki jyɑ̈gg-ɑ cyɑ̈dhi ki en. Kɑ jøge köbbe kinni pɑ̈ɑ̈r gen kömi kɑɑlɑni, codhe kɑ liny tɑd gen.
Kì bøli kenyɑni, ɑ́dɑ jɑltöng mɑ ɑ́kedhi yï Akɑɑb, ɑkööbe kinni, “Jwøng-ɑ Ácwɑ̈ɑ̈j ɑ́kööb kinni, ‘Yï ko böggi yi yɑy-ɑ dwøng èn! Ógöjjɑ tyɑmø yi yïn dicyɑ̈ngtïn, o yod yi yïn kinni bene yɑn Jwøng-ɑ Ácwɑ̈ɑ̈j.’ ”
Liny ɑ́tuum e cɑ̈ng ying-ɑ dïmɑl. Benɑdɑd mɑ̈dhø ki møgø, o rumø ki nɑ̈gø yi møgø, ge obëëdø kì thɑ̈thi ɑkɑnnì geki jyɑ̈gg-ɑ pyɑ̈r ɑ́dɑ̈g wïdɑ́ryew møg-ɑ ɑ́bï be kønyii ki liny.
Kɑ Rɑ̈dh Benɑdɑd köbbi yi jɑggi linye kinni, “Jwöggi gen bɑ jwöggi kïttì, bene ɑ ɑ́tyɑɑm wɑ yi gen, de wiy wɑ nyïɑ̈ggi wɑ ki gen kì yij bɑ̈j, men-ɑ́ ge ceg yi wɑ kɑ tyɑmø.
Kɑ yï cung ki yɑy me dwøng ni men-ɑ ɑ́wiy yïn piny. Kí kyënyì geki yɑ̈ɑ̈th mø kwɑnni gen pɑ̈r ki mø tyeli mɑl. Wɑ ónyïɑ̈ggi ki gen kì yij bɑ̈j, o ge ceg yi wɑ kɑ tyɑmø ceth.” Kɑ kwøbbi gen yïëy yi Benɑdɑd. Kɑ møg-ɑ ɑ́cïgii yi gen gwøge.
Kɑ yɑɑy Isrɑil kiw, ɑbëën gen ki jɑmmi gen; ge ɑ́kedh kɑ ge ogudø ki kɑ̈dd ɑ́ryew mø rwööm ki yɑɑy Arɑm, ge nënni ge nɑ ɑkudd ɑ́ryew mø dyëg, de men-ɑ́ yɑɑy Arɑm piny pɑ̈ɑ̈ng en.
Kɑ jɑltöng kedh-ɑ yï Akɑɑb, kɑ gø köbbe kinni, “Jwøng-ɑ Ácwɑ̈ɑ̈j okööbø kinni, ‘Mɑ́ tyëng Arɑm ɑ́kööb kinni i yɑ bɑ Jwøøg kïttì, o yɑ pɑth ki Jwøøg bɑ̈j, yɑɑy gen, yɑy-ɑ dwøng ɑnɑn göjjɑ’ tyɑmø yi wun, o yod yi ji kinni, bene yɑn Jwøng-ɑ Ácwɑ̈ɑ̈j.”
Kɑ liny Isrɑil geki liny Arɑm tyëg-ɑ cyɑ̈ng ɑ́bïryew ge obëëdø kì kɑ̈ddi gen ge nenn-ɑ nyingi gen. Kɑ liny ócɑ̈gø kì bïryeew cyɑ̈ng. Kɑ Isrɑil ónɑ̈ggø ki ji ɑ́lïp miyø kì kelli liny Arɑm.
Kɑ jyɑ̈gge kedh-ɑ yïe, ɑköbbii yi gen kinni, “Wø ɑ́lïng kinni i rɑ̈nhi Isrɑil pëthi gen nyii lɑ̈ɑ̈mø ki ji. Wiy wø kedhi wøn yï rɑ̈ɑ̈dh Isrɑil wø rug-ɑ ocwɑ̈llì ki thøll kì muddi wøn, men-ɑ ólɑ̈ɑ̈m pyëwe, kɑ yï wiy yi en yï pɑ nɑ̈g yi en.”
Codhe, kɑ ri gen lunyi gen ki ocwɑ̈llì, kɑ muddi gen wëni gen ki thøll, ɑkedhi gen yï Akɑɑb, ɑkööb gen kinni, “Bɑ̈ngí, Benɑdɑd okööbø cem e kwɑjj-ɑ yïn kipe wëye.” Alöggi Akɑɑb kinni, “Nudd e onëënø! Bɑ ómïɑ!”
Kɑ Benɑdɑd okööbø kinni, “Myërr-ɑ ɑ́kwɑny yi wïyɑ kì yï wïyí döggɑ’ yïn! O rií ócuggø gëddø yi yïn ki kej ngyew kì Dimɑceg ni men-ɑ ɑ́gwøg yi wïyɑ kì Sɑmɑriyɑ̀.” Kɑ Akɑɑb okööbø kinni, “Yï ógøny yi yɑn kɑ per møgɑni.” Codhe, ɑgønye gøn, kɑ kɑɑm gen cïbi gen ki lwöbø.