Ak kiyaigei Solomon koek tilionut ak Parao laitoriatab Misri, ak kiitun cheptab Parao, ak komut konyo nganasetab Daudi, kot koges teeksetab gonnyi, ak gotab Jehovah, ak irimet ne kiyiem Jerusalem.
Ak kile Solomon, Kiiyachi otwogindeng’ung’ Daudi baba mieindo ne o, ko u ye kiwendote taing’ung’ eng’ imanit, ak eng’ imanda, ak eng’ lititindab muguleldo eng’ inye; ak kiigonorji inendet mieini o, amu kiigochi inendet werit kotebe ng’echerennyi ne bo laitornatet, ko u ra.
Ak nguno anyun, ee Jehovah Kamuktaindennyu, kiiyai otwogindeng’ung’ koek laitoriat kogeer Daudi baba: ago ane, ko ta ko a lakwet ne ming’in; mangen ole amandoitoi ak ole among’undoi.
Igochi anyun otwogindeng’ung’ muguleldo ne tinyei kaguiyet si koruokyi biguk, si kobiit abesio ne mie ak ne ya; amu ng’o anyun ne imuchi koruokyi bororioning’ung’et toogunot?
Ak kilenji Kamuktaindet inendet, Amu kaisom kii, ama isomjige isob keny; ama isomjige magornatosiek, ama isom kebar buniguk; ago kesomjige kaguiyet ibesie kiruoget;
keero, kaayai ko u ng’olyondeng’ung’; keero, kaagonin muguleldo ne ng’om, ak kotinyei kaguiyet; ne kitomo kobiitu age ne ogerge, ama kobiitu age ne ogerge eng’ let.
Ak kigos Solomon, ak keero, ki karuotitoet: ak kinyo Jerusalem, ak kotonon eng’ taitab moinget ne bo arorutietab Jehovah, ak kogoito kagochinoik che kibeelei, ak kogoito kagochinoikab kalyet, ak koyachi igorta otwogikyik tugul.
Ak king’eet kemoi kwen, ak komut werinnyu eng’ ye koami kota konuuchi otwogindeng’ung’ ne chepto, ak komonji tegennyi, ak konde lakwennyi ne kagome tegennyu.
Yeityo kong’alalji kwondo ne ki nenyi lakwet ne sobei, laitoriat, amu kirir mo agobo werinnyi, ak kile, Ee kiptaiyandennyu, Igochi inendet lakwani sobei, amat ibar. Ago kile age, Mabunjina, ama bunjinin; pchei.
Ak kigas Israel tugul kiruoget ne kiiruoch laitoriat; ak kiiywei laitoriat: amu kigeer kole mi ng’omnatetab Kamuktaindet eng’ inendet, si kobiit koruoch.