Kɛ Bäna gat Ä-ɣi-lud kä Ta-nak, kɛ Mɛ-gi-do, kɛ Beth-can kɛɛliw min te gekä Dha-rɛ-than piny Yidh-rɛɛl, a känɛ ni kä Beth-can a wä nikä A-bel-mɛ-ɣola, a räth ni kui̱ Yɔk-mam in dɔ̱ŋ.
Kɛ Bɛn-gɛ-bɛr kä Ra-moth-gil-yad (Jɛn tekɛ wi̱i̱ Ya-ir gat Ma-na-thɛ, tin te kä Gil-yad, kä tekɛ ro̱o̱l Ar-gob, min te kä Ba-can, wi̱i̱ ti jiɛn bäkɛl tin di̱t tin tëë pa̱nyni kɛnɛ thiekni yieethä.)
Kä cu Thɔ-lo-mon I-thɛ-rɛl ruac kɛɛliw a känɛ jɛ ni kiir Yu-pɛ-ree-tidh amäni mun ji̱ Pi-li-thɛt, a räth ni keth I-jëp. Cukɛ Thɔ-lo-mon lätikä kä nöŋkɛ jɛ tho̱lbo̱k kɛ ni̱n teekädɛ diaal.
Kɛ ɣöö ruaacɛ jɔk ɣɔaa kiɛɛr Yu-pɛ-ree-tidh kɛɛliw a känɛ nikä Tip-thɛ̈ a wä ni kä Gadha, te kua̱r jɔak kiɛɛr Yu-pɛ-ree-tidh diaal pinydɛ, kä cuɛ tekɛ mal kɛ ji̱ thieekädɛ diaal.
Kä kɛn ji̱ kɔaar kua̱r tɔ̱tɔ̱ mockɛ kuäär mi̱eth kɛnɛ nɛy diaal tin ci ben wi̱i̱ tokä kua̱r ni Thɔ-lo-mon, te ramɔ kɛ paydɛ lät. La kɛn ti diaal a jak kä te wa̱nɔ.
Kɛ ɣöö lenyɛ nɛy diaal tin kɔ̱ŋ kɛ pɛl, pɛli jɛn kä E-than raan Ɛdhra, kɛnɛ Ɣe-man, kɛ Kɛ̈l-kol, kɛnɛ Dar-dɛ̈, gat Ma-ɣol. Kä cu kɛ̈kdɛ räth kä ji̱ thieekädɛ.
Kä cuɛ ruac kɛ kui̱ jiɛn, kɛ kui̱ ŋuer in te kä Lɛ-ba-nɔn amäni lath in la do̱ny puɔ̱ny pa̱a̱ny. Kä cuɛ ruac bä kɛ kui̱ leeyni, kɛnɛ diit, kɛ muɔl piɛny, kɛnɛ rɛc.