“A mi ni m ba Dauda min’ o dimnim’ bɛn gil’ o daa kul tuhirila taba hal ka Yawɛ daa ti chɛ ka o nyaŋ ba. Lala zuɣu n-daa chɛ ka o bi tooi me Yawɛ ŋun nyɛ o Naawuni ŋɔ jɛmbu duu.
Dinzuɣu ka n lo nia ni m me jɛmbu duu ti Yawɛ ŋun nyɛ n Naawuni ŋɔ kaman ŋun’ Yawɛ ni daa pun yɛli m ba Dauda, ‘N ni ti yɛn zaŋ a bi’ so leei naa zal’ a zaashee n-ni ti me jɛmbu duu ti ma.’
Dinzuɣu pumpɔŋɔ chɛ ka bɛ ŋma Lɛbanɔn sida dari ti ma, ka n chɛ ka n tumtumdiba kana ti pah’ a tumtumdiba maa zuɣu, ka n yo a a ni zali ni n yo a tumtumdiba maa zuɣu shɛm; dama a mi ni so ka ti ni m-mi dakuɣiri ŋmabu kaman Sidɔnnima.”
Hiram ni daa wum Sulemaana ni yɛli shɛm maa, ka di niŋ o nyaɣisim pam, ka o yɛli, “Zuŋɔ dabisili ŋɔ m paɣiri Yawɛ ŋun ti Dauda bi’ yɛndana ni o su ninvuɣ’ shɛb’ bɛn galisi pam ŋɔ.”
Ka Hiram daa tim ti yɛli Sulemaana, “N wum a ni tim na nti yɛli ma shɛm la, ka m mali shili ni n-niŋ a ni bɔri shɛlikam zaa zaŋ chaŋ sida dakuɣiri mini sipirɛs dakuɣuri ŋmabu polo la.
N tumtumdiba ni zaŋ dakuɣiri maa Lɛbanɔn n-tahi teeku ni nti lo li tabili taba n-zaŋ li doli teeku n-tah’ a ni wuhi luɣ’ shɛl’ la nti lɔrigi li nimaani ka yi deei li. Ka a mi ti m mini n yiŋnim’ bindirigu din nyɛ n gba ni bɔri shɛl’ la.”
Ka Sulemaana mi daa bo alikama din tibisim nyɛ tɔn tusaayi mini kpa’ viɛlli lita tuhi’ kɔbisinahi n-ti Hiram min’ o yiŋnima. Lala ka Sulemaana daa kul niŋdi tiri Hiram yuuni kam.
Ka Yawɛ daa shiri ti Naa Sulemaana yɛm kaman o ni daa lo o alikauli shɛm, ka suhudoo daa be o mini Hiram sunsuuni; ka bɛ niriba ayi maa daa niŋ naŋgban’ yini.
Ka Naa Sulemaana daa zali Izraɛlnim’ zaa ni bɛ bom’ tumtumdiba na ka bɛ ti tum tuma, ka bɛ ni daa bo tumtumdib’ shɛb’ na kalinli daa yiɣisi ninvuɣ’ tuhi’ pihita.