O ɓurduɗo koo moy neɗɗo hikma, o ɓuri Etan Esrahiijo, o ɓuri boo Heman e Kalkol e Darda, ɓiɓɓe Maahol. Innde maako saŋkiti nder ummaatooje taariiɗe fuu.
O wolwi haala leɗɗe, diga lekki cemmbiɗki haa Libanon haa haako isop ko wurtoto haa mahi. O wolwi boo haala dabbaaji e colli e ladooji e kuukon piiroohon e liɗɗi.
“A anndi baaba am Daawuda heɓaay mahango Jawmiraawo Allah maako suudu, ngam konne'en maako ɗonno ukkano mo koo gal toy fuu. Ammaa Jawmiraawo walli mo, o jaali ɓe.
Kadi, mi waɗi anniya nyiɓango Jawmiraawo Allah am haykaliiru. Ngam ndaa ko Jawmiraawo wi'i baaba am Daawuda: Ɓiɗɗo ma mo njo'inanmi dow leeso laamu maaɗa, kaŋko nyiɓantammi haykaliiru ngam innde am.
Jonta kam, umru huuwooɓe ma ɓe pe'anammi leɗɗe cemmbiɗɗe haa Libanon. Huuwooɓe am ngaran ngam wallugo ɓe. Mi yoɓete ngeenaari huuwooɓe ma fodde ko a wi'ata yam fuu. Ngam a anndi walaa koo gooto caka amin waawi fe'ugo leɗɗe bana Sidoni'en.”
Huuwooɓe am adoyan leɗɗe diga Libanon haa Mbeela. Ɓe kaɓɓan ɗe ngam ilnugo ɗe haa yotto nokkuure nde a anndinta yam. Ton, ɓe piistata ɗe, huuwooɓe ma ngara koocane ɗe. Ndaa ko ƴammaami, hokku yimɓe saare am nyaamdu.”