Sɩda, yaa dĩm dãmb wʋsg zugu la a Salomo da rɩt naam. A soolma yɛdga al Efrat kʋɩl kãsengã, n wat Filisti rãmb tẽnga, n tat Ezipt toaaga. Dĩm bãmb fãa da reegda a noore la b ra kɩta yõor yaoodo, n tãag a Salomo kaalem.
Ned ba a ye ka paam yamzulung wala a Salomo rẽnna ye. A yamvẽenem yɩɩga Ezrayitga a Etã rẽnna, n yɩɩg a Ema, a Kalkol la a Darda, a Maol kamba. A yʋʋra taa tẽnsa fãa sẽn gũbgã.
A goma tɩɩs yelle; a goma tɩ-bɛd sẽn be Libã yelle, wala a sẽn gom tɩ-bõones sẽn lolemd lalse yelle. A goma rũms yelle, luiili yelle, wiis la kʋɩl-zẽed yelle.
«Y paam n bãnga neere tɩ m ba, a Daviid, ka tõog n me roogo Soaala-Wẽnd waoogr yĩng ye. A zaba ne a bɛɛba, goabg la rɩtgo, n tãag Wẽnd sẽn na n kɩt t'a maan raood n tõog a bɛɛbã.
Woto wã m tagsa m na me roogo Soaala-Wẽnd waoogr yĩnga, wala b meng sẽn wilg m ba, a Daviid, n yeel-a: ‹Yaa fo biiga la m na zaoolg f zaoora zugu la yẽ n na n me roog m waoogr yĩnga.›
Dẽ yĩnga, kɩt tɩ b kɛ Libã ra-sĩdma. M neba na n naaga fo neba. M na yao f neba sẽn tʋmd m yĩnga wala d sẽn na n sed ne taabã. Tõnd ka tar neb sẽn mi raad kɛɛbo wala Sidõ rãmb ye!»
M neba na n tall-b lame n sig mogrã, n yi be n wa ne b zĩig ning y sẽn na n wilgi. M na lood-b be n kõ yã. Mam sẽn dat wa m dolbo, yaa y sõng-m ne koodo, m zak yĩnga.»
A Salomo toola a Iram alkam; yaa bõeens tus pisi n zɩlg alkama n kẽng, yẽ ne a neba yĩnga, n paas oliv ka-yɩlgemde bõeens pisi sẽn tõe n zɩ. A Salomo ra kɩt-b la boto yʋʋmd-yʋʋmd fãa.