“Lebanaw Tho O” tahpa ta moh bipa ta, Sawlawmaw ta abei o cha a sa. A doh lâ dy za kha seih ta, a hâ lâ dy sypangawh kawh ta, dy sythôh â sâh. Sidy otôh tlâh palih ta patlâhpa chô liata palaih nata pâkôzy sidy tho hmâpa a châ.
Otôh hluhpi a hneipa aikah tao ta, a doh lâ dy sypangawh seih ta, a hâ lâ dy sythôh a kawh. Aikah hmia liata laitlâ y ta, cha hmia liata chôkhu a hneipa otôhzy a y.
Beidyuchhai Aikah tao ta, he he ryurei nawpa su a châpa vâta, Ryureina Aikah tahpa ta awpa a châ. Cha cha siphiah tawhta palaih taihta sidy tho ta khupa a châ.
Ryureina Aikah hnôhlâ dôhpachhôh tlyhmia chhâna lâ liata abei pahrâ nawpa o y ta, cha cha aikah nata a lyupa ta sapa a châ. Sawlawmaw ta a lapinô, Phiraoh sawchanô châta chhao, aikah nata â lyupa ta o a sapa hra.
He o zydua he alô pha ngaitapazy hmâpa ta sapa a châ. Alôzy cha â su thaipa ta khai pachie khai hapa châ ta, a hmia a hnôh ta thoâna ta pamihpa a châ. He hawhna heta o abôna tawhta a palaih taihta nata dôhpachhôh tlyhmia kawh ngaitapa zy tao khaipa a châ.
Dôhpachhôh tlyhmia kawh ngaitapa cha, alô khaipa tho thôh nata sidy thophia tho kha ta â dôpa ta dôhpa châ ta, cha hawhna chata Abeipa o dôhpachhôh tlyhmia nata aikah chhao taopa a châ.
Hirâ cha Nâthalai chi nôhmei sawchapawpa châ ta, a paw cha Tyre khihpa, dawh a daih thaipa a châ. Sona nata novâhna ta a biepa chyhsa châ ta, dawh daina kyh liata kheihawhpa rai a tao thaipa, zôthai ngaitapa a châ. Hirâ cha Bei Sawlawmaw lâ a vy ta, a rai zydua a hriapa lymâ.
Hirâ ta Dawh tôh miano â khopa ta leih ta, he dawh tôhzy he â sâhna lâ dy hrawh hleicharie châ ta, dy hrawh hleino â hlôpa a châ. A karyhpa ta taopa châ ta, zô palih a chha.
Dawh tôh pawhmao liata lubyuhpa cha dawh sao ta khupa châ ta, dawh sao miakha cha dawh bâlia miasari ta chapaipa a châ. Lubyuhpa miakha châta dawh sao miakha lymâ a tao.
Dawh tôh mianopazy pawhmao liata lubyuhpazy y ta, chazy cha dawh sao kiapâh liata â hlôpa ta taopa chô lâta taopa a châ. Cha lubyuhpazy liana cha pawmikarânâ nothlahpa za no raihrie sopa châ ta, lubyuhpa padôpa ta tlâh no ta taopa a châ.
Tipâh tlâh ry liata, dy kha liata titheih theih hrawh lymâ ta, tipâh a dôna taihta titheihzy pataohpa a châ. Titheihzy cha tlâh no ta paziahpa châ ta, tipâh nata leih pâpa a châ.
Tipâh cha viahchao tôhpa pô hrawh hleino chô liata patyupa châ ta, pô thôh maw lâ a heih ta, pô thôh notla lâ a heih ta, pô thôh chho lâ a heih ta, pô thôh nochhi lâ â heih. Viahchao tôhpazy chô liana chata tipâh cha patyupa châ ta, a chhôh lâ ama chao ama chhy khai.
A tlâhzy ta patusapa dawhphiazy liana cha chakeibarôhneipazy, viahchao tôhpazy nata cherubi nothlahpazy a choh ta, chakeibarôhneipazy nata viahchao tôhpazy chô lâ nata ry lâ ta a tlâhzy liata pawpi nothlahpazy taopa a châ.
Patyuna to ta dawh tiaki miapalih nata dawh lâhreizy hnei ta, a ki palihzy liata biebuh ahniehnazy y ta, ahniehnazy cha a kâ to liata pawpi nothlahpazy taopa ta leihpa a châ.
Patyuna chhôh liana cha biebuh so nawpa byh taopa châ ta, â hlôpa ta a paka taopa a châ. A chô lâ dy kha a chaluah ta, a ry lâ dy kha nata khophie â pamôh. A paka cha â ngia kawpa ta khiepa a châ. Patyuna dawhphiazy deikua cha ki palih a hnei, â hlô veih ei.
Chatawhcha dawh biebuh miahrawh tao ta. Biebuh cha a chhôh dy palih a thupa châ ta, kachu sypalih â tlôh. Patyuna miahrawhzy châta biebuh miakha chyu taopa a châ.
Chatawhcha patyunazy cha Achhyna o chho lâ liata miapangawh soh ta, Achhyna o maw lâta miapangawh soh hra ta, tipâh laipa cha chho nochhi lâ liata a patyu.
Hezy he a tao: Dawh tôh miano, dawh tôh pawhmao liata dawh lubyuhpa miano nata dawh tôhzy pawhmao liata dawh lubyuhpazy khu nawpa ta dawh sao miano tao ta,
Beihzy, buchâh linazy nata biebuhzy chhao a tao. Cha Abeipa o liata hmobaoh, Hirâ ta Bei Sawlawmaw châta a taopa zydua cha, dawh patliesapa ta taopa ama châ khai.
Hmobaohzy cha hluh ngaita ta, khopathliah tiah awpa a châ leipa vâta, Sawlawmaw ta hmobaoh zydua cha khopathliah hlei vei. Chavâta dawh hmobaohzy amâ hrina ziepa cha pahnopa châ vei.
ngôh suapa ta taopa nyuzy, meiôh lao chakienazy, biebuhzy, ropahâhpa beihkohzy nata mei lanazy a tao. Achhyna o chhôh chaipa, Su Pathaih Chaipa lâ angiana nata Achhyna ochhôh pipa lâ angiana ochhi patunazy chhao ngôh ta a tao khai.
Cha hawhna chata Bei Sawlawmaw ta Abeipa o châta a tao awpa zydua cha patlô ta. A paw Dâvi ta Abeipa lâ a vaw hlâ hapa tâkâzy, ngôhzy nata hmobaohzy cha Sawlawmaw ta a ngiakhei ta, Abeipa o liata sôh sopakhyna suzy liata soh khai ta.