Sẽn-Ka-Saab yeela yẽnda yaa: «Mam wʋma fo pʋʋsgã ne f kosgã f sẽn kos maamã. Dẽ, mam na n welga roog ning fo sẽn me n kõ maamã toore, n ning m yʋʋrã a pʋgẽ wakat fãa yĩnga, la mam belmã ne m sũurã na n zĩnda ro-kãngã pʋg wakat fãa.
La foom a Salmo sã n tũ maam ne pʋ-peelem, la ne burkĩndi, wa f ba a Davɩɩd sẽn dag n tũud maamã, la f maan bũmb nins mam sẽn yeel foom tɩ f maanã, fo sã n sak mam noyã ne m minindã,
mam na n kɩtame tɩ f soog Israyɛll rĩungã wakat fãa, wa mam sẽn dag n yeel f ba a Davɩɩdã. Mam dag n yeel-a lame yaa: ‹Fo kõn tol n kong yageng sẽn na n led fo zĩigẽ n dɩ naamã Israyɛll ye.›
mam na n yiisa Israyɛll nebã tẽng ning mam sẽn kõ-bã pʋgẽ, la mam na n zãaga m meng ne roog ning mam sẽn welg toor m yʋʋrã yĩngã. Woto, Israyɛll nebã na n lebga wa bõn-yaalga, la buud a taabã na n yaala bãmba.
Ro-kãngã sẽn tar ziir to-to wã na n lebga raboogo, tɩ ned sã n pɩʋʋgd a sɛɛgẽ n loogdẽ bɩ a yɛɛse, n fɩɩle, n yeele: ‹Yaa bõe tɩ Sẽn-Ka-Saab maan tẽn-kãngã ne ro-kãngã a woto?›
La b na n leoka a soab yaa: ‹Ad yaa Israyɛll nebã sẽn bas Sẽn-Ka-Saab sẽn yaa bãmb Wẽnnaamã, sẽn yiis-a bãmb yaab-rãmbã Ezɩpt tẽngã, n tɩ pʋgd wẽn-naands n waoogd-bã yĩng n kɩte, tɩ Sẽn-Ka-Saab me bas tɩ yel-beed a woto paam-ba.› »
Tɩɩr dĩm a Hiram rag n tallda sɛɛdr ne sɩprɛs tɩɩs raado, n wat n kõt rĩm a Salmo, la ne sãnem sẽn zems rĩmã sẽn dat tɛka. Dẽ, rĩm a Salmo yãka tẽms pisi Galɩle soolmã pʋgẽ n kõ a Hiram.
Dẽ, rĩm a Hiram yeela rĩm a Salmo yaa: «M saam-biiga, yaa bõe tẽms la fo sẽn kõ maamã?» La a pʋda tẽmsã yʋʋr tɩ Kabulli, sẽn dat n togs tɩ ‹ka võor ye›, la b ket n boonda tẽn-bãmb a woto hal tɩ ta rũndã.
Ad tʋʋm-wɛgl nins rĩm a Salmo sẽn modg nebã tɩ b tʋmã: Yaa Sẽn-Ka-Saab roogã ne a na-yirã meebo, la Milo ne Zeruzalɛm lalgã, la Hatsoor ne Megido, la Gezɛɛr tẽmsã meebo.
Ezɩpt rĩm a Faarõ dag n kẽng n tɩ zab n tõoga Gezɛɛr tẽngã n ning-a bugum, la a kʋ Kana nebã sẽn dag n be a pʋgẽ wã. La a rag n dɩka tẽn-kãng n kõ a bi-pugl ning sẽn yaa rĩm a Salmo pagã, a kuilsgã wakate.
La b mee tẽms nins fãa rĩm a Salmo sẽn dag n bĩngd a laogã, ne a saar-dãmbã, la a wiidã. Rĩm a Salmo mee bũmb nins fãa yẽnda sẽn datã Zeruzalɛm ne Libã, la a soolmã fãa pʋgẽ.
La bu-bãmb yagensã sẽn dag n ket n be tẽngã pʋg tɩ Israyɛll nebã dag n ka tõog n kʋ wã, rĩm a Salmo rɩka bãmb tɩ b yaa yembs n tʋmd tʋʋm-wɛglã hal tɩ tãag rũndã.
Rĩm a Salmo ka tol n yãk Israyɛll ned ba a yembr n kẽes yembd ye. Bala, Israyɛll nebã n dag n yaa yẽnda tãb-biisi, la a tʋmtʋmdba, la a nanambse ne a tãb-biisã nanambse, tɩ kẽer yaa a saar-dãmbã ne a wed-rʋʋdbã nanambse.
Yʋʋmd fãa, rĩm a Salmo rag n maanda maand sẽn yõogd bugum ne zems-n-taar maand naoor a tãabo, tẽn-kugr ning yẽnda sẽn me Sẽn-Ka-Saab yʋʋrã yĩngã zugu, la a yõogd tɩdar tẽn-kugr ning sẽn be Sẽn-Ka-Saab taoorã zugu. Yɩɩ woto la rĩm a Salmo me Sẽn-Ka-Saab roogã n sɛ.