Ani eliwor iyong, ani kisub iyong etich kang kotere iteni ka ateneanut, loger lokolong asubea apakon Daudi, ani kiwap iyong ngitalio kang ka ngakiro nakadungokini ayong iyong,
Nakaneni ani kirea iyong anikang, kori kereasi ngalesea kon anikang, towout akiwap ngitalio kang ka ngakiro nakadungok ayong esi, sodi kilipa ngakujo ngache,
Ainakinit Iram lo arai ekapolon a Tiro Solomon ngiboro luduket lu araakasi ngakito a ngichekereng, ka ngidomou ta egolit daang lo asakitae asubea etich ngolo. Ani erumor etich, nak Solomon Iram ngirerea ngitomwon-arei anakwap a Galilaya.
Kidesik ekapolon Solomon ngitunga etich lo akiduk akai a Akuj, ka akai a ekapolon, ka akiduk ewae lo alo kide ere kimulelearae, ta akiduk awas a ere. Abu nabo kidesik ngitunga akiduk ngirerea a Asor, ka Megido, ta Geser. (
Aremi sek ekapolon a Misiri Geser tolema, taar ngitunga lu alomito neni, sodi kichunyak ere akim. Ani erumor kipoto ere ngolo nak nakookeng akolongit na eusea Solomon apese ngina,
ka ngirerea lu ekachio ngiboro a Solomon, ka ngirerea lu ayakasi ngangolei keng ka ngaurukukui na iritae, ta ibore cha daang ni asaki ngesi akiduk alo Yerusalem, ka Lebanon, ta ngiwaitin luche cha daang a akwap ana apolokinit ngesi.
Nakaneni abu Solomon nyiitiliwo Ngisirael ngikedalak, pearai abu kitiliwo kesi ngasigerea keng, ka ngikapolok a arieng, ka ngikarikok a ngasigerea, ka ngikapolok a ngaurukukui ana irito ngangolei, ta ngikameak ngangolei.
Abu nakookeng a ekapolon a Misiri na arai aberu a Solomon taramak alore a Daudi tolot kai a ekapolon na adukokini Solomon ngesi. Ani erumor toduk Solomon ewae lo alo kide ere kimulelea.
Epeyoene Solomon ngakipeyos na inomio ta na ekisil, kipeyo alokeno a Akuj ngakipeyoet ngauni alokaru a epei. Enomanakini ngesi Ekapolon Akuj tani emitina. Sodi torumo ngesi akiduk akai a Akuj.