1
Ogẹn Ehabụ eze ndị Izrẹlụ ẹbamịn-ugu gi nwụnhụngụ, ya ndị Mụabụ nọ jụ nị ndị Izrẹlụ hụ akịkọzị wẹ.
2
Ahazia hụn wụ nwan eze ndị Izrẹlụ gha ngịgan wẹ gi ganye windo mmughẹ ẹ rị ibe elu dan, rụ ẹhụ, imẹ obodo Sameria. Ọ nọ han ụkọ, sị wẹ, “Jẹn ni d'a jụ Baalụ-Zẹbubu, hụn wụ mmọn ndị alị Ẹkrọnụ, kẹ ni m dịnhịn.”
3
Kanị mmọn-ozi Osolobuẹ nọ bịa d'e kunrun Ẹlaịja onyẹ Tishibẹ, sị a, “Lihi ọtọ d'e kunrun ndị eze Sameria zi, nị ị jụ wẹ, ‘Chuku arịdẹ nwan Izrẹlụ haịn ọnụ gi jẹnkọ d'a jụ Baalụ-Zẹbubu mmọn ndị Ẹkrọnụ ọnụ?’
4
Lee nwan ihiẹn Osolobuẹ ku, ‘Y'e lihikọ elu bẹdi ahụn i dinẹ. Ị k'a nwụnrịrị!’ ” Ya Ẹlaịja nọ jẹnmẹ d'a gwa wẹ.
5
Ogẹn ndị hụ eze wụ Ahazia zi gi kinhẹn, eze nọ jụ wẹ, “Kị ụnụ kinhẹnni?”
6
Wẹ nọ sị a, “Okẹnnyẹ ohu bịa d'e kunrun ẹnyi ụzọ, sị ẹnyi, ‘Kin ni azụụn d'e kunrun eze zini ụnụ. Sị n'a, “Lee ihiẹn Osolobuẹ ku: Chuku arịzị alị Izrẹlụ haịn i gi zikọ wẹ d'a jụ Baalụ-Zẹbubu mmọn ndị Ẹkrọnụ ọnụ? Y'e lihikọ nwan bẹdi ahụn i dinẹ. Ị k'a nwụnrịrị!” ’ ”
7
Eze nọ jụ wẹ, “Nanị kẹ okẹnnyẹ hụ kunrun ọnụ ụzọ gwa ụnụ okuni nọ?”
8
Wẹ nọ sị a, “Ẹhụ a mẹ ẹṅẹnrẹn-ẹṅẹnrẹn, o je akpụkpọ anụ ukun.” Eze nọ sị wẹ, “Ẹlaịja onyẹ Tishibẹ rọ.”
9
Ya kẹ eze nọ zi ọkị-agha ohu lẹ ndị-agha iri kwasị ọgụnnaị rị okpuru ẹ d'a kpọha Ẹlaịja. Ọkị-agha hụ nọ chọburu Ẹlaịja. O ru ẹ, e lee Ẹlaịja k'ọ nọdị nwan alị elu òke, ọ nọ sị Ẹlaịja, “Onyẹ-ozi Osolobuẹ, Eze sị ị, ‘Hidan!’ ”
10
Ẹlaịja nọ sị ọkị-agha hụ, “Omẹni m wụ onyẹ-ozi Osolobuẹ, ọkụn ya gha elu-igwee bịa d'e ripụ yụ lẹ ndị-agha ị iri kwasị ọgụnnaị!” Ya ọkụn nọ gha elu-igwee bịa, ripụ ọkị-agha hụ lẹ ndị-agha a iri kwasị ọgụnnaị!
11
Eze nọzị zi ọkị-agha ọzọ lẹ ndị-agha iri kwasị ọgụnnaị rị okpuru ẹ d'a kpọha Ẹlaịja. Ọkị-aghanị nọ sị Ẹlaịja, “Onyẹ-ozi Osolobuẹ, eze sị ị, ‘Hidan ozigbo-ozigbo!’ ”
12
Ẹlaịja nọ sị wẹ, “Omẹni m wụ onyẹ-ozi Osolobuẹ, ọkụn ya gha elu-igwere bịa d'e ripụ yụ lẹ ndị-agha ị iri kwasị ọgụnnaị!” Ya ọkụn Osolobuẹ nọ gha elu-igwere bịa, ripụ ọkị-agha hụ lẹ ndị-agha a iri kwasị ọgụnnaị.
13
Ya eze nọzị zi ọkị-agha nke ẹtọ lẹ ndị-agha iri kwasị ọgụnnaị rị okpuru ẹ. Ọkị-aghanị mẹ wẹ ẹtọ nọ shi elu òke hụ Ẹlaịja rị, gbun'ẹ osekpu, rịọma a, sị, “Onyẹ-ozi Osolobuẹ, dodo, mẹ ndụn m lẹ ndụn mmadụ iri kwasị ọgụnnaịnị nọkẹ sị o nwọnghọ ihiẹn ọ wụ — nị idibo i kẹ ẹnyi wụ!
14
Ledẹ kẹ ọkụn dọn hụ gha elu-igwee bịa, ripụsọnmẹ ọkị-agha ẹbụọ bu ụzọ bịa, onyẹ-onyẹ lẹ ndị-agha a iri-kwasị-ọgụnnaị! Dodo mẹ nwan ndụn m nọkẹ sị o nwọnghọ ihiẹn ọ wụ!”
15
Ya mmọn-ozi Osolobuẹ nọ sị Ẹlaịja, “Sọnrin ẹ; atụlẹ egun ẹ.” Ya kẹ Ẹlaịja nọ lihi, sọnmẹ ẹ d'e kunrun eze.
16
Ẹlaịja nọ sị eze, “Lee ihiẹn Osolobuẹ ku: ‘Chuku arịdẹ Izrẹlụ hụn ị k'a jụ ọnụ ra, i gi zi wẹ d'a jụ Baalụ-Zẹbubu wụ mmọn ndị Ẹkrọnụ? Makẹ ihiẹnni i mẹ, y'e lihikọ elu-bẹdi ahụn i dinẹ; ị k'a nwụnrịrị.’ ”
17
Ẹrịra kẹ eze wụ Ahazia dọn nwụnhụn, oku Osolobuẹ hụn Ẹlaịja ku a bụn. Ya kẹ Joram (Jehoram) nwẹnẹ ẹ nọ nọkin ẹnya a, kịma — makẹni Ahazia amụnị okẹnnyẹ. Hụn mẹ ahụa ẹbụọ Jehoram nwa Jehoshẹfatị kịma Juda kẹ Joram nwẹnẹ Ahazia kịma ndị Izrẹlụ rị ẹbamịn-ugu.
18
Ihiẹn ndị ọzọ ile mẹni ogẹn Ahazia gi rị a kị lẹ ihiẹn o mẹ rị imẹ ẹkụkwọ wẹ detọ ihiẹn mẹ ogẹn ndị-nze hụn kịsọnmẹ ndị Izrẹlụ ẹbamịn-ugu.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc