“Hụn ẹkụkwọ-ozini gihụ ru ọnụ ẹka, ebe o mẹ ni ụnụ lẹ ụmụ di-nwọnni ụnụ rị, ebe o mẹ ni ụnụ e nwọnghọ ụgbọ-ẹshin agha lẹ ẹshin lẹ obodo wẹ tụnhunmẹ mgbọn lẹ ihiẹn-ọgụn,
Ya Jehu nọ dejẹnni wẹ ẹkụkwọ-ozi nke ẹbụọ, sị, “Omẹni azụụn nke m kẹ ụnụ rị, ni ihiẹn m gwa ọnụ kẹ ụnụ sikọ d'e mẹ, weri ni isi ụmụ di-nwọnni ọnụ bịa d'e kunrun m imẹ Jezriẹlụ mgbeni ekile.” Ụmụ ikẹnnyẹ eze iri kwasị ọgụn-ẹtọ ndị hụ rịsọnmẹ ẹka ndị ndu obodo hụ; uwẹ rị azụn wẹ.
Marịn nị nwan n'o nwọnni ihiẹn ọwụlẹ Osolobuẹ ku n'o k'e mẹ ikpụlọ Ehabụ hụn jẹnkọlẹni d'a bụn. Osolobuẹ e mẹzuchanrịngụọ ihiẹn ile o gi odibo ẹ wụ Ẹlaịja ku.”
Ya Jehu nọ gbuchanrịn ndị ile họdụ ezi-lẹ-ụlọ Ehabụ imẹ Jezriẹlụ lẹ ndị-isi ile Ehabụ tumẹ, ndị o gi e mẹ ẹhụ lẹ ndị nchụn-ẹjan a; onwọnni onyẹ ọ latọn'a.
Ọ ghagụ ebẹhụ pụ, ọ nọ zu Jehonadabụ nwa Rekabụ hụn lala d'e kunrun ẹ. Jehu nọ kele ẹ, sị a, “I buhụ m obi kẹ m dọn bu i obi?” Jehonadabụ nọ sị a, “Ẹghẹẹ, m buhụ i obi.” Jehu nọ sị a, “Omẹni i buhụ m obi, ye m nwan ẹka ị.” Ọ nọ ye ẹ ẹka a, Jehu nọ yen'ẹ ẹka banhan imẹ ụgbọ-ẹshin.
Ọ nọ zi ozi ghagbarị Izrẹlụ ile, ndị ile e fe Baalụ ọ nọ bịa; onwọnni onyẹ ohu imẹ wẹ bịalẹni. Wẹ ile nọ ruban imẹ ụlọ-mmọn Baalụ, jun ẹ gha isi ẹ ni d'e ru isi ẹ ni.
Wẹ nọ banye d'a chụn ẹjan, ye oyiye w'a dụn ọkụn. Ogẹnni, Jehu e butọgụọ mmadụ ọgụn-ẹnọ ezi, sị wẹ, “Imẹ ụnụ ile, onyẹ nị onyẹ ọwụlẹ imẹ ndị m rị e buche ụnụ ẹka nahịn a, o gi isi ẹ kụ ụgwọ a.”