Amaa ka Naa Jɔram bipuɣiŋga Jɛhɔshɛba ŋun daa nyɛ Ahazia tizɔpaɣ’ la daa tim nabihi maa ni n-kpuɣi Ahazia bia Jɔash ŋun nyɛ bɛ ni daa kuri shɛb’ maa ni yino min’ o biyola nti sɔɣi Yawɛ jɛmbu duu du’ shɛl’ ni, ka Atalia daa bi nya o ku.
Amaa zaŋ chaŋ yuun’ shɛli din pahir’ ayopɔin ni, ka Jɛhɔiada daa tim ti boli sapashinnim’ shɛb’ bɛn daa guli naa mini nayil’ la n-chɛ ka bɛ ka o sanna Yawɛ jɛmbu duu, ka o ti chɛ ka o mini ba lo tab’ alikauli, ka chɛ ka bɛ po pɔri Yawɛ jɛmbu duu maa ni. Ka o daa zaŋ nabia maa wuhi ba.
Di saha ka o daa zali ba zaligu yɛli, “Yi ni yɛn niŋ shɛm m-bɔŋɔ: Yinim’ bɛn ti ka tuma ni na Vuhim Dabisili dali pirigibu buta zuɣu yim n-yɛn guli nayili,
Bɛ zaa yinoyino gbib’ bɛ bidibbina bɛ nuhi ni n-ʒe n-gil’ naa, ka ŋunkam kani bɛ sanna, bɛn’ kum’ o. Naa yi ti chani luɣ’ shɛlikam, bɛn’ kul be o sani.”
Ka sapashinnim’ maa daa niŋ kaman maligumaana Jɛhɔiada ni daa yɛli ba shɛm maa. Ka bɛ zaa daa zaŋ bɛ niriba bɛn bi yɛn be tuma ni mini bɛn yɛn be tuma ni Vuhim Dabisili dali n-ka maligumaana Jɛhɔiada sanna.
Ka guliba maa zaa daa gbib’ bɛ bidibbina n-ʒiɛya gu Naawuni jɛmbu duu maa nudirigu polo zaŋ ti kpa nuzaa polo m-mali ti gili sara maligu bimbini mini Naawuni jɛmbu duu maa.
Di saha ka Jɛhɔiada daa zaŋ nabia Jɔash n-yina ti booi kpam bah’ o zuɣu ni n-leeg’ o nam; ka zaŋ nam zuɣupiligu pil’ o; ka zaŋ Naawuni kundi ti o; ka bɛ kpahi bɛ nuhi ka yɛli, “Naawuni dolim’ naa ŋɔ nyɛvili!”
nti nya ka naa maa ʒe n-tabi daantaliga kaman bɛ kali ni daa nyɛ shɛm; ka sapashinnim’ mini kikapiɛbiriba ʒe m-baɣ’ o. Ka bɛ tiŋgbɔŋ maa nim’ zaa daa mali suhupiɛlli, ka piɛbiri kikahi. Ka Atalia daa darigi toog’ o chinchini ka kuhi yɛli, “Nyaanyibo! Nyaanyibo!”
Ka maligumaana Jɛhɔiada daa yɛli sapashinnim’ bɛn su tɔbbihi fukumsi la, “Zaŋmiy’ o doli guliba maa sunsuuni gari, ka zaŋ takɔb’ ku ŋunkam be o polo.” Dama maligumaana maa daa yɛlimi, “Di kuny’ o Yawɛ jɛmbu duu puuni.”
Di saha ka tiŋgbɔŋ maa ni niriba zaa daa chaŋ Baal jɛmbu duu nti ŋme n-wurim li, ka wurim di bimbina, ka ŋme n-wurim di binnana, ka ku Matan ŋun daa nyɛ Baal tindan’ la bimbina maa tooni. Ka maligumaana Jɛhɔiada daa bo guliba n-zali, ka bɛ guli Yawɛ jɛmbu duu.
Ka o daa zaŋ sapashin’ kpamba mini bɛn guli naa ni nayili guliba ni tiŋgbɔŋ maa niriba zaa m-pa omaŋ’ zuɣu, ka bɛ zaŋ naa maa yi Yawɛ jɛmbu duu maa ni n-gam giŋgaani ti gari guliba dunol’ la ni n-chaŋ ti kpe nayili, ka o ti ʒin’ o nam ʒiishee din nyɛ nanim’ ʒiishee la.