Hi Joas la nga anak ni Ahasias an waray kamatay. Gin-iiparatay na hiya upod han iba, kundi gintago hiya ni Joseba nga iya dada. (Anak hiya nga babaye ni Hadi Joram ngan bugto hiya ni Ahasias.) Gindara niya ngadto han higdaan nga kwarto han Templo hi Joas ngan an iya paramangno, ngan gintago hiya, sanglit waray hiya kamatay.
Kundi dida han ikapito ka tuig, ginpakuha ni Joyada nga padi an mga opisyal nga tinaporan han mga gwardya han hadi ngan an mga gwardya han palasyo, ngan ginpakadto hira ha Templo, diin ginpasumpa hira niya nga umuyon hira han iya plano. Katapos, iginpakita niya ha ira hi Joas nga anak ni Hadi Ahasias,
ngan iginhatag ha ira ini nga mga sugo: “Kon kumanhi kamo hin pagbuhat han iyo katungdanan ha Adlaw nga Iparahuway, magbabantay han palasyo an usa han ikatulo nga hugpo ha iyo;
magbabantay ha Ganghaan han Sur in lain liwat nga ikatulo nga hugpo ngan magbabantay han ganghaan kaupod han iba nga mga gwardya in lain pa nga ikatulo nga hugpo.
Babantayan niyo hi Hadi Joas, nga daan andam an iyo mga espada, ngan ayaw niyo hiya bayai bisan mapakain hiya. Kinahanglan patayon niyo an bisan hin-o nga humarani ha iyo.”
Ginsugot han mga opisyal an mga sugo ni Joyada, ngan gindara ngadto ha iya an ira mga tawo—adton mga waray turno ha Adlaw nga Iparahuway ngan adton mga may-ada turno.
Ngan gindara ha gawas ni Joyada hi Joas, iginbutang ha iya ulo an korona, ngan iginhatag ha iya an balaod hin pagkahadi. Niyan gindihogan hiya ngan iginpasangyaw hiya nga hadi. Nagparakpak ngan nangogliat an mga tawo, “Mabuhi an hadi!”
Hinkit-an niya didto an bag-o nga hadi nga natindog ha ligid han harigi ha aragian han Templo, sugad han nabatasan. Ginlilibotan hiya han mga opisyal ngan han mga paratrompeta, ngan nangogogliat nga malipayon an ngatanan nga mga tawo ngan nagtrotrompeta. Ginggisi ni Atalia an iya mga panapton ngan ginmoliat, “Mga maglingo kamo! Mga maglingo kamo!”
Diri karuyag ni Joyada nga patayon hi Atalia didto ha dapit han Templo, sanglit nagsugo hiya han mga opisyal han kasondalohan, “Dad-a hiya ha gawas didto ha butnga han mga rungbay hin mga gwardya, ngan pataya an bisan hin-o nga magpasipara hin pagtalwas ha iya.”
Pinaagi han sagdon ni Joyada nga hadi ngan han mga tawo, naghimo hira hin ginsaaran ha Ginoo nga magigin mga tawo hira han Ginoo; ngan ginhimo liwat in ginsaaran para han hadi ngan han mga tawo.
Nasingadto ha templo ni Baal an mga tawo hin pagbungkag han templo; ginruba nira didto an mga altar ngan an mga ladawan, ngan ginpatay hi Matan nga padi ni Baal didto ha atubangan han mga altar. Binutangan ni Joyada hin mga gwardya an Templo,
ngan niyan binmunyog han hadi an mga opisyal, an mga gwardya han hadi, an mga gwardya han palasyo, ngan hi Joyada tikang ha Templo ngadto ha palasyo, nga ginsusunod han ngatanan nga mga tawo. Sinmulod an hadi pinaagi han Ganghaan han Gwardya, ngan linmingkod ha trono.