Dalam taun ti ketujuh Raja Jehu merintah menua Israel, Joas berengkah nyadi raja menua Judah, lalu iya merintah di Jerusalem empat puluh taun. Indai iya benama Sibiah, ari nengeri Beer-seba.
Ku Joas bejaku ngagai bala imam, “Semua duit ti diberi nyadi pemeri ti kudus ti dibai ngagai Rumah TUHAN, nya duit chukai, enggau duit ti dienjuk nitihka peneka ati diri, ti dibai ngagai Rumah TUHAN,
awakka imam nerima duit nya ari genap iku orang ke meri pemeri nya, lalu awakka sida imam nyeruri Rumah TUHAN nya genap kali utai ti patut diseruri ditemu sida imam.
Nya alai, Raja Joas lalu mesanka Jehoiada enggau bala imam ti bukai, lalu nanya ngagai sida, “Nama kebuah kita enda nyeruri Rumah Sembiang? Belabuh ari diatu, kita enda tau nyimpan duit ti diterima kita. Kita enda tau enda nyerahka duit nya, ngambika Rumah Sembiang diseruri.”
Imam Jehoiada lalu ngambi siti peti, ngaga siti lubang ba tudung peti nya, lalu ngengkahka peti nya ba atas alta, muak ari kanan penama ngagai Rumah Sembiang. Bala imam ke bekereja ba penama nya, nyimpan dalam peti nya semua duit ti diberi bala orang ke datai besembiang.
Lebuh penyampau duit nya udah dituliska, sida lalu nyerahka pirak nya ngagai orang ke nyadi tuai megai pengawa dalam Rumah Sembiang, kena sida mayar bala tukang kayu, enggau bala tukang ke ngaga rumah,
Tang duit nya enda dikena begagaka mangkuk pirak, mangkuk, terumpit, tauka pekekas kena ngintu lampu, tauka sebarang utai bukai ti digaga ari pirak tauka emas.
Duit ti diberi nyadika piring kena bebayarka ukum penyalah, enggau piring pengampun dosa, enda disimpan dalam peti nya, laban duit nya diberi ngagai bala imam.
Raja Joas menua Judah lalu ngambi semua pemeri ti udah diserahka bala raja ke dulu agi ari iya, iya nya sida Jehosapat, Jehoram, enggau Ahasiah, ngagai TUHAN. Iya lalu nambahka pemeri ti diberi iya empu, enggau semua emas ti dalam sarang reta Rumah Sembiang, enggau di istana, lalu ngirumka semua duit nya nyadika pemeri ngagai Raja Hasael. Raja Hasael lalu mai bala soldadu iya angkat ari Jerusalem.
Bala pemesai Raja Joas lalu bepekat ngelaban iya. Dua iku ari bala sida, iya nya Josakar anak Simet, enggau Jehosabat anak Somer, munuh iya dalam rumah ti digaga ba tanah tambun ti ba tisi timur nengeri Jerusalem, ba jalai ngagai Sila. Joas dikuburka ba lumbung bala raja di Nengeri David, lalu anak iya Amasiah nganti iya nyadi raja.