Ak kilenji Jeoas tisiik, Ingoib tisiik fedaisiek tugul che bo tuguk che itabanotin che kiibu kobwa gotab Jehovah, ak fedaisiek che kiboisie, fedaisiek che bo bik che te che yamei koitetab chi age tugul, ak fedaisiek tugul che kaibwat chi eng’ muguleldanyi kole koib kobwa gotab Jehovah,
Koguur anyun laitoriat Jeoas tisiindet Jeoiada, koboto tisiik alak, ak kolenji ichek, Amu nee si moteeche ole kigobutok eng’ got? Noto anyun, amata oib fedaisiek eng’ che ongenge, ogoite keyae ole kigobutok eng’ got.
Ago kinam Jeoiada moinget, ak korut kereiywondennyi, ak konde taban eng’ kaptisisiet, eng’ komostab tai kebendi go eng’ gotab Jehovah: ak kiinde moingonoto tisiik che kiribei kurget, fedaisiek tugul che kigiibu kobwa gotab Jehovah.
Ak kingogeer kole kagochang’a fedaisiek eng’ moinget, kotogos sirindetab laitoriat ak tisiindet ne o konde lolonik ak koiit kogeer kit ne te fedaisiechoto kimi gotab Jehovah.
ak bik che teekse koik, ak che waei koik, ak koalei baoinik ak koik che kwaotin che kiteege ole kiga kobutok eng’ gotab Jehovah, ak koalei tuguk tugul che kigiib keteege got.
Ago ma kiyachi gotab Jehovah kikombokab feda, anan ko magasisiek che kitile ole lalei eng’ taisiek, anan ko tabok, anan ko igondisiek, ak terenik alak tugul che bo tahabu, anan ko terenikab feda, eng’ fedaisiek che kigiib kobwa gotab Jehovah:
Ak kinam Jeoas laitoriatab Juda tuguk tugul che itabanotin che kiga itaban Jeosapat, ak Jeoram, ak Aasia, kwanisiekyik, laitorinikab Juda, ak tugukyik che itabanotin, ak tahabusiek tugul che kimi konoraikab gotab Jehovah, ak che bo gotab laitoriat, ak koyokyi Hasael laitoriatab Suria: ak kiwa eng’ Jerusalem.