Ahazia sawchapawpa Zudâh bei Zôasâ kô kih nata kô thôh â bei kô ta, Zehu sawchapawpa Zehôahâ cha Izarei chô liata Samâri liata a bei pathao ta, kô hrawh hleisari â bei.
Chavâta Abeipa cha Izarei chô liata a pathi ia ta, âmo cha Aramia bei Hâze ku liata nata Hâze sawchapawpa Benhadâ ku liata ama hro chhôh zydua ta a pie ha ei.
Chatanachata Abeipa ta Izarei cha pachhatuhpa pie ta, Aramia mo ku tawhta pua ei ta, Izarei sawzy cha ama y tyhpa hawhta ama o chyu liata y heih ei ta.
Zehôahâ cha arâ pheisaih sypangawh, talailih miahrawh nata alei pheisaih thy kha dei hnei bâ ta. Aramia bei ta pahleipadia khai ha ta, sawhri buchadoh hawhta a tao khai hapa vâta a châ.
Zudâh bei Zôasâ kô sythôh nata kô sari â bei kô ta, Zehôahâ sawchapawpa Zehôasâ cha Izarei chô liata Samâri liata abei pathao ta, kô hrawh hleicharu â bei.
Ano chhao cha Abeipa mohmô liata hmo pha lei ngaitapa tao ta, Izarei a pamoleisapa Nebâ sawchapawpa Zerôbaw moleina zydua siesai leipa ta, tao lymâ ta.
Elaisâh cha thikhei awpa pasana hri ta pasa ta. Izarei bei Zôasâ cha ano lâ zu ta, chakhei ta, “Ei pâ, Hy ei pâ! Izarei talailihzy nata ama arâ pheisaihzy ta a ypa y!” tah ta.
Elaisâh ta, “Nochhi la opy kei pahy teh,” tah ta, pahy ta. Elaisâh ta, “Ka teh,” tah ta, ka ta. Elaisâh ta, “Kha kha pahniena Abeipa châtai, Aramia mo pahniena châtai a châ khawh! Aphe liata Aramia mo a dyuh aw chi ta, ama chhâ khaina taihta na thie aw ei,” tah ta.
Khazohpa chyhsa cha a chô liata a pathi ia ta, a hnohta, “Ei pangawh ei charu chhâ nâ chô awpa mâh a châ tâh. Cha hawhta na tao khiahta cha, Aramia mo cha ama chhâna taihta na thie ha awpa ei châ ta, tahmâ deikua cha Aramia mo cha ei thôh deita na pahnie aw,” tah ta.
Chyhsa pakha ama pabu hai nota, hraotuhpa py kha kei hmô ei ta, chyhsapa ri cha Elaisâh thlâ liata za thy ei ta, a ri ta Elaisâh ruzy a za hriapa nahta, vaw hroh heih ta, a phei ta a kaw duah ta.
Châhrasala Abeipa ta Abarahâ, Aisika nata Zakaw zy chô liata a biehrai vâta, Izarei sawzy cha ngiachhie ta, a thapasa kaw tyh ta. Chavâta âmo lâ a heih heih tyh ta, Izarei sawzy cha pahleipadia khoh leipa ta, tahmâ taihta a mohmô tawhta âmo cha thy pathlah khoh vei.
Hâze sawchapawpa Benhadâ ta Zehôasâ paw Zehôahâ siehnao ta khihpi a la hapazy cha, Zehôasâ ta chhu heih ta. Zôasâ ta Benhadâ cha ei thôh pahnie ta, Izarei khihpizy a la pakhua khai haw.