1
Hụn mẹ ẹ ahụa ẹtọ kwasị ọgụn eze Juda wụ Jụashị nwa Ahazia kịma, Jeho-ahazị nwa Jehu nọ kịma ndị Izrẹlụ ẹbamịn-ugu. Obodo Sameria k'ọ nọ kị Izrẹlụ. Ahụa mmẹsa k'ọ kị.
2
O mẹ ihiẹn rịlẹni mma ẹnya Osolobuẹ ebe ọ nọ mẹ njọ hụ Jerobụam nwa Nebatị mẹ, hụn Jerobụam dọ Izrẹlụ ye imẹ ẹ. Jehuahazị alatọn'a.
3
Ya kẹ Osolobuẹ nọ gi olulu sọn Izrẹlụ, mẹ wẹ nọbie okpuru Hazaẹlụ eze Aram lẹzi okpuru Bẹn-Hadadị nwa Hazaẹlụ.
4
Ya Jeho-ahazị nọ rịọ Osolobuẹ eyemẹka, Osolobuẹ nọ gọn ẹ ntịn, makẹni Osolobuẹ a hụngụọ nị eze ndị Aram rị a bịangbu ndị Izrẹlụ rị azụụn ẹbamịn-ugu hụ ọda-ọda.
5
Osolobuẹ nọ wẹhẹni ndị Izrẹlụ rị ẹbamịn-ugu onyẹ zụọpụhanị wẹ, wẹ nọ gha okpuru Aram pụ. Ya ndị Izrẹlụ nọ biri udọn-lẹ-ndọnkwa iwe wẹ kẹ wẹ dọn e bi mbụ.
6
Kanị ewepụkwọnị wẹ ẹka njọ ikpụlọ Jerobụam, njọ hụn ọ han Izrẹlụ mẹ. Wẹ hụkwọ e mẹ ẹ: osisi wẹ zumẹ wẹ gi a rụa Ashẹra rịkwọ nwan obodo Sameria.
7
Onwọnzini ihiẹn họdụnị imẹ ndị-agha Jeho-ahazị karị mmadụ iri kwasị ọgụnnaị gi ẹshin a lụ agha, ụgbọ-ẹshin iri lẹ mmadụ nnụ-uku iri (10,000) gi ụkụ e jẹn agha, makẹni eze Aram e gbuchanrịngụọ ndị-agha Izrẹlụ Ẹbamịn ugu, zọkpụkpọ wẹ nọkẹ ẹjan rị alị.
8
Ihiẹn ndị ọzọ mẹni kẹ Jeho-ahazị rị a kị, ihiẹn ile o mẹ lẹ ihiẹn ile o rụn rị imẹ ẹkụkwọ wẹ detọ ihiẹn ndị mẹ ogẹn ndị-nze Izrẹlụ Ẹbamịn ugu gisọnmẹ kị.
9
Jeho-ahazị a nwụnhụn, laburu ndị nẹdi ẹ wẹ, wẹ nọ li ẹ ye obodo Sameria, nwa a wụ Jụashị hụn wụzị Jehụashị nọ họnrin eze, nọkin ẹnya a.
10
Hụn mẹ ahụa mmẹsa kwasị ọgụn Jụashị kịma Juda, Jehụashị nwa Jeho-ahazị nọ kịma Izrẹlụ. Obodo Sameria k'ọ gha kị; ahụa mmisin k'ọ kị.
11
O mẹ ihiẹn rịlẹni mma ẹnya Osolobuẹ, onwọnni njọ Jerobụam nwa Nebatị mẹ hụn Jehụashị mẹlẹni, njọ hụn Jerobụam han Izrẹlụ mẹ; ọ latọnị wẹ.
12
Ihiẹn ndị ọzọ mẹni kẹ Jehụashị (Jụashị) nwa Jehuahazị rị a kị, ihiẹn ile o mẹ lẹ ihiẹn ile ọ rụn — kẹ agha ọ lụ Amazia eze Juda, wẹ rị imẹ ẹkụkwọ w'e detọ ihiẹn ndị mẹ ogẹn ndị-nze Izrẹlụ gisọnmẹ rị a kị.
13
Jehụashị a nwụnhụn, la, rịkẹ ndị nẹdi ẹ, nwa a wụ Jerobụam nọ nọkin ẹnya a elu ukpo-eze, kịma; obodo Sameria kẹ wẹ liye Jehụashị, wẹ li ẹ ye ebe w'e liye ndị-nze hụn kị Izrẹlụ azụụn hụ.
14
Ogẹnni, emu hụn jẹnkọ d'e gbu Ẹlaịsha rị a kụ a. Jehụashị wụ eze Izrẹlụ azụụn hụ nọ bịa d'a hụn a, kwanman'a ẹkwan, sị, “Baba! Baba! Ụgbọ-ẹshin lẹ ndị e nyin ẹshin alị Izrẹlụ!!”
15
Ẹlaịsha nọ sị a, “Jẹn d'e wẹhẹ ụta ohu, y'a kịha ọbara.” Ya eze nọ wẹhẹ wẹ.
16
Ọ nọ sị eze Izrẹlụ, “Dọ ụta ahụn.” Ọ dọgụ a, Ẹlaịsha nọ kị ẹka a kwasị eze ẹka ẹbụbụọ.
17
Ẹlaịsha nọ sị eze, “Gụnpụ windo rị nkọ anwụn nọ a wa.” Ya ọ nọ gụnpụ a. Ẹlaịsha nọ sị a, “Gba!” Ọ nọ gba. Ẹlaịsha nọ sị, “Ọbara Osolobuẹ gi e mẹri; ọbara wẹ gi e mẹri Aram! Ị k'a nọ imẹ Afẹki gbuchanrịn ndị Aram.”
18
Ọ nọ sị a, “Kịrị ọbara ndị hụ.” Ọ nọ kịrị wẹ. Ẹlaịsha nọ sị a, “Gi wẹ fịan alị.” Ọ nọ fịan a mgbe ẹtọ, fịanbehi.
19
Ya kẹ iwe nọ we odibo Chuku, ọ sị a, “Nkẹ y'a fịanzudẹ alị mgbe isẹn mọbụ mgbe isin, ọhụn nkẹ e mẹ i mẹri Aram, tikpọchanrịn a ru alị. Mgbe ẹtọ sụọ k'i sikọ nwan d'e mẹri ẹ.”
20
Omẹgụ, Ẹlaịsha nọ nwụnhụn, wẹ nọ li ẹ. Ogẹn ahụn, o nwọn ndị alị Mụabụ a bịa mbidọn ahụa d'a maye a kwanarịn ndị Izrẹlụ rị azụụn hụ ihiẹn wẹ.
21
Ụhụọhịn ohu, o nwọn ndị Izrẹlụ rị e li okẹnnyẹ ohu, idẹnmizi wẹ nọ hụn ndị Mụabụ hụn a maye ịhịan a kwarị ihiẹn ẹ kẹ wẹ lalanị; ya wẹ nọ hụhụ tụ ozun okẹnnyẹ hụ ye ili Ẹlaịsha. Hụn ozun ahụn gihụ mẹtụ ọkpụkpụ Ẹlaịsha, okẹnnyẹ hụ nọ tẹnhin, wuzo ọtọ.
22
Ọrọgbọ hụ ile Jeho-ahazị kị, Hazaẹlụ eze Aram rịchanrịn a bịangbu Izrẹlụ.
23
Kanị Osolobuẹ nkẹ nọ gi ufiri nkwerigbama ya lẹ Ebraham, Aziki lẹ Jekọpụ mẹni wẹ ọhụnma, mẹ omikẹn wẹ, ghọsị nị ọnọdị wẹ e mẹtụghọ a. D'e rukwọ nwan tannị ọ rịn'a n'o tikpọ wẹ mọbụ chụpụ wẹ ihun ẹ.
24
Ogẹn Hazaẹlụ wụ eze Aram gi nwụnhụn, Bẹn-Hadadị nwa a nọ nọkin ẹnya a, kịma.
25
Ya Jehụashị nwa Jeho-ahazị nọ napụha Bẹn-Hadadị nwa Hazaẹlụ obodo ndị hụ o gi agha narịn nẹdi ẹ wụ Jehuahazị. Mgbe ẹtọ kẹ Jehụashị mẹri Bẹn-Hadadị, gi ẹrịra nwọnkinhẹnchanrịn obodo ndị wẹ narịn Izrẹlụ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc