To kata kamano, ne ok giweyo timbe maricho mag dhood Jeroboam, mane Jeroboam omiyo jo-Israel otimo, to ne pod giluwogi. Kido mar nyasaye ma dhako miluongo ni Ashera bende ne pod ni Samaria.
Ruoth Nyasaye noweyo ni Jehoahaz mana jolweny alufu apar, gi joidh farese piero abich, kod geche lweny apar, nikech ruodh Aram nosetiekogi mi gichalo mana mihudhi.
Kane Elisha tuo gi tuo mane biro nege, noyudo Jehoash ruodh Israel osedhi nene, moywage ni, “Wuora! Wuora! Isebedonwa kaka geche lweny gi joidh farese mag Israel.”
To Elisha, ng’at Nyasaye, nokecho kode, mowachone niya, “Da bed ni ichielo piny nyadibich kata nyadiuchiel, to eka da itieko jo-Aram chuth, to koro inilogi mana nyadidek kende.”
To chieng moro kane jomoko yiko ng’ato, ne gipo ka gineno wasigu kabiro, mi ne gibolo ringre ng’atno ei liend Elisha. To kane ringre ng’at mothono olwar kuom choke Elisha, chunye noduogo, mochung’.
To Ruoth Nyasaye nong’wononigi, kendo nokechogi, koparo singruok mane otimo gi Ibrahim kendo gi Isaka kod Jakobo. Emomiyo ne ok otiekogi, kata witogi oko ne ok owitogi.
Jehoash wuod Jehoahaz nomayo Ben-hadad wuod Hazael mier mane Hazael ogolo e lwet Jehoahaz wuon mare e lweny. Jehoash noloyo Ben-hadad nyadidek, mi nodwoko miergo ni Israel.