Ka ngwaga wa masome a mabedi a metšo e meraro wa Joase morwa wa Ahasia kgoši ya Juda, kwa Samaria gwa thoma go buša Joahase morwa wa Jehu kgoši ya Isiraele; a fetša nywaga e lesome la metšo e šupago a le kgoši.
Ke ka baka leo bogale bja Morena bo tuketšego Isiraele, a ba gafela diatleng tša Hasaele kgoši ya Siria, le seatleng sa Benehadada morwa wa Hasaele lebaka leo ka moka.
Le ge go le bjalo ga ba ka ba tlogela dibe tša Jerobeama yola e a rutilego Isiraele go senya, ba swara ka tsela ya tšona; le kokwane ya Ašera e be e fela e eme motseng wa Samaria.
Ka kgonthe Joahase o be a se sa na batho, ge e se banamedi ba dipitsi ba masome a mahlano, le dikoloi tše lesome, le bahlabani ba dikete tše lesome, gobane kgoši ya Siria e be e ba feditše boka lerole lebatong.
Ge e le ditaba tše dingwe tša Joahase, le tšohle tše a di dirilego, le tša bogale bja gagwe, naa ga di a ngwalwa mo pukung ya ditaba tša kgale tša dikgoši tša Isiraele?
E be e le ka ngwaga wa masome a mararo a metšo e šupago wa Joase kgoši ya Juda, ge Joase morwa wa Joahase a eba kgoši ya Isiraele motseng wa Samaria; a buša a fetša nywaga e lesome le metšo e selelago.
O dirile tše di befetšego Morena, a se ke a lahla le sebe setee sa tša Jerobeama morwa wa Nebata e a rutilego Isiraele go senya, a swara ka tsela ya tšona.
Ge e le ditaba tše dingwe tša Joase, le tšohle tše a di dirilego, le tša bogale bja gagwe ka mo a nago a lwa le Amatsia kgoši ya Juda, naa ga di a ngwalwa mo pukung ya ditaba tša kgale tša dikgoši tša Isiraele?
Mola Elisa a babja, e le bolwetši bjo a hwilego ka bjona, gwa tla Joase kgoši ya Isiraele a mo hlola, a lla a lebane nae a re: Tata! Tata! Koloi ya Isiraele le banamedi ba yona!
Elisa a botša kgoši ya Isiraele a re: Nganga bora ka seatla sa gago. A bo nganga ka seatla sa gagwe. Elisa a bea diatla tša gagwe mo diatleng tša kgoši,
a re: Bula lešoba la go leba bohlabela! A le bula. Elisa a re: Betša! A betsa. Elisa a re: Hee mosebemonamodi wa Morena! Mosebe monamoladiatleng tša Basiria! O tlo fenya Basiria kwa Afeke wa ba wa ba fediša!
Monna wa Modimo a napa a mo galefela a re: Ge o ka be o tiile lefase gahlano, o ka be o tlo fenya Basiria wa ba fediša; Basiria bjale o tlo ba fenya gararo fela.
Ya re ba sa boloka mohu e mongwe lebitleng leo, ba bona go etla sera; ba fo lahlela mohu eo lebitleng la Elisa. Mohu eo ge a gohlomela, a wela mašapong a Elisa; a boela a phela, a ema ka dinao.
Fela, Morena a ba gaugela, a ba kwela bohloko, a ba boela ka baka la kgwerano ya gagwe, ye a e dirilego le Aborohama le Isaka le Jakobo; a se ke a rata go ba fediša, le bjale a se ke a ba lahla.
Gomme Joase morwa wa Joahase a thopolola go Benehadada morwa wa Hasaele metse yela ye Hasaele a bego a e thopile go Joahase tatagwe ka ntwa. Joase o bile o mo fentše gararo, a mo amoga metse yeo e bego e le ya Isiraele.