×

Ika Bible 2018

2 Ndị-nze 14

1
Hụn mẹ ẹ ahụa ẹbụọ Jehụashị nwa Jeho-ahazị họnrin eze ndị Izrẹlụ ẹbamịn-ugu kẹ Amazia nwa Jụashị kịma Juda.
2
Ọ rị nwa ahụa isẹn kwasị ọgụn k'o họnrin eze. Ahụa itenẹi kwasị ọgụn k'ọ kị; Jerusalẹm k'ọ nọ kị. Nnẹ ẹ wụ Jehụadini onyẹ Jerusalẹm.
3
O mẹ ihiẹn rị Osolobuẹ mma ẹnya, kanị o mẹruni nẹdi ẹ kanị wụ Defidi, nzọmụkụ nẹdi ẹ wụ Jụashị k'o sọnchanrịn.
4
Ofufe hụ wẹ rị a dan Iwu e fe Osolobuẹ ebe jẹnsọnmẹ elu a kụsịkwọnị, ndị alị hụkwọ e jẹn ebẹhụ d'a chụnnị Osolobuẹ ẹjan, a mụ nsẹnsi.
5
Mgbe ukun gi rugụ Amazia alị ọhụnma-ọhụnma elu ukpo-eze ẹ, ọ nọ gbu ndị-isi hụ gbu nẹdi ẹ.
6
Kanị o gbuni ụmụ ndị hụ gbu nẹdi ẹ. O m'ẹ hụ kẹ ọ rị imẹ Ẹhụhụọ Iwu Mozizi ebẹhụ Osolobuẹ nọ sị, “Egikwọlẹ ni ufiri njọ nẹdi gbu ụmụ wẹ mọbụ gi ufiri njọ ụmụ gbu nẹdi wẹ; onyẹ hụn mẹ njọ kẹ wẹ k'e gbu.”
7
Amazia wụ onyẹ hụn gbu ndị Ẹdọm nnụ-uku iri (10,000) imẹ Ọdanmgbugbu-nnu, gi agha weri obodo Sẹla, kpọma a Jok'tiẹlụ hụn w'a kpọkwọ a nwan d'e ru tannị.
8
Amazia nọ zi ozi jẹnni eze Izrẹlụ wụ Jehụashị nwa Jeho-ahazị nwa Jehu, kpọ a mgba, sị a, “Bịa nị ẹnyi mẹpụ a elee-m elee-i.”
9
Jehụashị eze ndị Izrẹlụ ẹbamịn-ugu nọ sị Amazia eze Juda, “Abị-ogun rị ọfịa Lẹbanọnụ zi ozi jẹnni okẹn-osisi sida rị ọfịa Lẹbanọnụ, sị a, ‘We nwa ị okpoho ye nwa m okẹnnyẹ lụrụ.’ Anụ-ọfịa ohu rị Lẹbanọnụ e jẹnhẹn, zọkpụkpọ ogun nwẹn.
10
Eziẹ rọ nị y'e mẹrighọ alị Ẹdọm, ọ hụ e bu i isi. Ṅanmakwọ nị ị mẹri emẹri; ka nọdịkwọ iwe i! K'ị rị a chọnị oku jẹnkọ d'e budann'ị, budanzị Juda ị rị a kị?”
11
Kanị Amazia egọndẹni ntịn, ya Jehụashị eze Izrẹlụ ẹbamịn-ugu nọ maye ndị Juda ọgụn. Ya lẹ Amazia wụ eze Juda nọ nọ imẹ Bẹt-Shẹmẹshi rị alị Juda lụ ọgụn ahụn.
12
Ndị Izrẹlụ nọ mẹri ndị Juda, ndị Juda nọ gbalasọnmẹ iwe wẹ.
13
Jehụashị eze Izrẹlụ nọ nwụndọn eze Juda wụ Amazia nwa Jụashị nwa Ahazia imẹ Bẹt-Shẹmẹshi. Ya kẹ Jehụashị nọ shi Jerusalẹm, kụtu mgbọn Jerusalẹm, gha Ọnụ-mgbọn Ifrem d'e ru Ọnụ-mgbọn rị Mgbugi — ihiẹn shịaru ọbụkụ ọgụn-iri kwasị nnụ.
14
Ya ọ nọ bukwama goru ile lẹ siliva lẹ ihiẹn ile wẹ hụn imẹ Ụlọ-nsọ Osolobuẹ lẹ ebe ile w'e dọnmẹ ihiẹn rị mkpa imẹ obi-eze. Ọ nọzị nwụnrụn ndị ọ nwụnrụn, lashi Sameria.
15
Ihiẹn ndị ọzọ mẹni kẹ Jehụashị rị a kị, ihiẹn ile o mẹ lẹ ihiẹn ile ọ rụn, kẹ agha ọ lụsọn Amazia eze Juda, wẹ ile rị imẹ ẹkụkwọ w'e detọ ihiẹn ndị mẹ ogẹn ndị-nze kị Izrẹlụ.
16
Jehụashị a nwụnhụn, laburu ndị nẹdi ẹ, nwa a wụ Jerobụam nọ họnrin eze nọkin ẹnya a; obodo Sameria kẹ wẹ liye Jehụashị, wẹ li ẹ ye ebe wẹ e liye ndị-nze Izrẹlụ.
17
Kẹ Jehụashị nwa Jeho-ahazị eze Izrẹlụ Ẹbamịn ugu nwụnhụngụ, Amazia eze Juda nọzị bizi ahụa mmisẹn n'o d'a nwụn.
18
Ihiẹn ndị ọzọ mẹni kẹ Amazia rị a kị rị imẹ ẹkụkwọ w'e detọ ihiẹn ndị mẹ ogẹn ndị-nze Juda gisọnmẹ kị.
19
Wẹ zun'ẹ eje-umẹ imẹ Jerusalẹm, ọ nọ gbashi Lakishi; kanị wẹ nọ zi ikẹnnyẹ chọburu ẹ Lakishi, nọ ebẹhụ gbu ẹ.
20
Wẹ nọ gi ẹshin bulụa a, li ẹ ye ebe wẹ liye ndị nẹdi ẹ imẹ Jerusalẹm, imẹ Obodo ahụn Defidi tụn.
21
Ya kẹ ndị Juda ile nọ weri Azaria, hụn rị nwa ahụa mmisin, kin ẹ eze, ọ nọkin ẹnya nẹdi ẹ wụ Amazia.
22
Azaria tụndọnzi obodo Ẹlatị, wekinni Juda ya kẹ Amazia nwụnhụngụ, laburu ndị nẹdi ẹ.
23
Hụn mẹ ẹ ahụa mmisẹn Amazia nwa Jụashị kịma Juda kẹ eze Izrẹlụ wụ Jerobụam nwa Jehụashị họnrin eze imẹ obodo Sameria, ọ nọ kị ahụa ohu kwasị ọgụnnaị.
24
O mẹ eje-ihiẹn ẹnya Osolobuẹ, ọ latọnị hụn ọwụlẹ imẹ njọ Jerobụam nwa Nebatị hụn Jerobụam dọ Izrẹlụ ye imẹ ẹ.
25
Jerobụam nke ẹbụọnị wekinni Izrẹlụ alị wẹ, e nwọnrinzi wẹ alị ile rị gha Lebo-Hamatị d'a pụ Ohimin Araba, Ohimin Nnu, nọkẹ kẹ Osolobuẹ wụ Chuku Izrẹlụ dọn ku ẹ ghahanị ọnụ odibo ẹ onyẹ-amụma wụ Jona nwa Amitaị, onyẹ Gatị-Hẹfa —
26
makẹni Osolobuẹ a hụngụọ eje-afụnfụn onyẹ ọwụlẹ rị Izrẹlụ rị a ta, kẹ igbọn kẹ ndị nwọn enwẹn wẹ, ọ hụngụọ a nị Izrẹlụ enwọn onyẹ k'e yeni wẹ ẹka.
27
Ebe o mẹ ni Osolobuẹ ekuni n'o k'e finchanpụ ẹfan Izrẹlụ elu-ụwa, ya ọ nọ gi ẹka Jerobụam nke ẹbụọ, nwa Jụashị, zụọpụha wẹ.
28
Ihiẹn ndị ọzọ mẹni kẹ Jerobụam nke ẹbụọ rị a kị, ihiẹn ile o mẹ lẹ ikẹn ile ọ kpa agha lẹ k'o dọn wekinni Izrẹlụ obodo Damaskọsụ lẹ obodo Hamatị, wẹ ile rị imẹ ẹkụkwọ w'e detọ ihiẹn ndị mẹ ogẹn ndị-nze Izrẹlụ gisọnmẹ kị.
29
Omẹgụ, Jerobụam nke ẹbụọ nọ nwụnhụn, laburu ndị nẹdi ẹ, ndị-nze Izrẹlụ, ya Zẹkaraya nwa a nọ họnrin eze nọkin ẹnya a.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes