Tsono Menahemu mwana wa Gadi, adachoka ku Tiriza nakafika ku Samariya. Adapha Salumu mwana wa Yabesi ku Samariyako, iyeyo nkuloŵa ufumu m'malo mwa Salumu.
Pambuyo pake Pulo, mfumu ya ku Asiriya, adadzathira nkhondo dziko la Israele. Ndipo Menahemu adakapereka kwa Pulo siliva wokwanira makilogramu 34,000, kuti Puloyo amthandize kukhazikitsa ufumu wake.
Chaka cha 50 cha ufumu wa Azariya mfumu ya ku Yuda, Pekahiya mwana wa Menahemu, adaloŵa ufumu wa ku Israele ku Samariya, ndipo adalamulira zaka ziŵiri.
Tsono Peka mwana wa Remaliya nduna yake, pamodzi ndi anthu makumi asanu a ku Giliyadi, adapangana za chiwembu napha Pekahiya ku Samariya m'chipinda choteteza nyumba ya mfumu. Pambuyo pake Pekayo adaloŵa ufumu m'malo mwake.
Chaka cha 52 cha ufumu wa Azariya mfumu ya ku Yuda, Peka mwana wa Remaliya adaloŵa ufumu wa ku Israele ku Samariya. Ndipo adalamulira zaka makumi aŵiri.
Nthaŵi ya Peka mfumu ya ku Israele, Tigilati-Pilesere mfumu ya ku Asiriya, adadzagonjetsa mizinda iyi: Iyoni, Abele-Beti-Maaka, Yanowa, Kedesi, Hazori, dziko la Giliyadi ndi la Galilea, ndiponso dziko lonse la Nafutali. Ndipo anthu onse am'menemo adaŵagwira ukapolo, napita nawo ku Asiriya.
Nthaŵi imeneyo Hoseya mwana wa Ela adachita chiwembu kuchitira mfumu Peka, namupha. Ndipo iyeyo adaloŵa ufumu m'malo mwake pa chaka cha 20 cha ufumu wa Yotamu mwana wa Uziya mfumu ya ku Yuda.
Komabe akachisi opembedzerako mafano pa zitunda sadaŵaononge. Anthu ankaperekabe nsembe namafukiza lubani pa malo amenewo. Yotamu ndiye adamanga chipata chakumpoto cha Nyumba ya Chauta.
Nthaŵi imene Yotamu ankalamulira, mpamene Chauta adayambapo kutuma Rezini mfumu ya ku Siriya ndi Peka mwana wa mfumu ya ku Israele, kuti akathire nkhondo dziko la Yuda.