×

Ika Bible 2018

2 Ndị-nze 16

1
Hụn mẹ ẹ ahụa mmẹsa Pẹka nwa Rẹmalịa họnrin eze Izrẹlụ Ẹbamịn ugu kẹ Ahazị nwa Jọtam họnrin eze Juda.
2
Ahazị rị nwa ahụa ọgụn k'o họnrin eze. Jerusalẹm k'ọ nọ kị. Ahụa mmisin k'ọ kị. O mẹni ihiẹn rị mma ẹnya Osolobuẹ wụ Chuku ẹ kẹ nẹdi ẹ wụ Defidi.
3
O mẹ kẹ ndị-nze Izrẹlụ Ẹbamịn ugu; o gidẹ nwa a chụn ẹjan w'a dụn ọkụn, eje arụ alị ndị hụ Osolobuẹ chụpụnị ndị Izrẹlụ e mẹ k'o mẹkọ.
4
Ọ chụn ẹjan ụlọ-mmọn, a mụ nsẹnsi, kẹ elu òke kẹ okpuru osisi ọwụlẹ duni.
5
Ya kẹ Rẹzini eze Aram lẹ eze Izrẹlụ wụ Pẹka nwa Rẹmalịa nọ jẹn d'a lụsọn Jerusalẹm agha: e kehunmẹ wẹ Ahazị lẹ obodo ẹ Jerusalẹm, kanị asanị wẹ ẹka maye ẹ.
6
Ogẹn ahụn kẹ Rẹzini wụ eze ndị Aram gi chụpụ ndị Juda gi obodo Ẹlatị alị Ẹdọm, ọ banzị ẹka ndị Aram, ndị Ẹdọm nọ kwaban Ẹlatị, biri ebẹhụ d'e ru tannị.
7
Ahazị nọ zi ozi jẹnni Tiglatị-Pilesa eze Asiria, sị a, “Odibo i lẹ nwa ị kẹ m wụ. Bịa d'a zụọpụha m ẹka eze Aram lẹ eze Izrẹlụ, nị wẹ rị e bu a nụmanị m.”
8
Ahazị e buru siliva lẹ goru wẹ hụn weri imẹ Ụlọ-nsọ Osolobuẹ lẹ ebe w'e dọnmẹ ihiẹn imẹ obi-eze buye wẹ jẹnni eze Asiria.
9
Ya eze Asiria nọ mẹ ihiẹn ọ rịọ a, maye obodo Damaskọsụ, weri ẹ, kpụnrụn ndị rị Damaskọsụ shi Kiri, gbu Rẹzini.
10
Eze wụ Ahazị nọ jẹn Damaskọsụ d'e kunrun Tiglatị-Pilesa eze Asiria. Ọ hụn ukpo nchụn-ẹjan ohu imẹ Damaskọsụ, o se ẹ ye ẹkụkwọ, kọwachanrịn k'ọ nọ lẹ kẹ w'a dọn rụn a, we ẹ ye wẹ jẹnni Yuria onyẹ-isi nchụn-ẹjan.
11
Yuria onyẹ-isi nchụn-ẹjan nọ rụn ukpo nchụn-ẹjan ahụn rịkẹ hụn eze gha Damaskọsụ seye wẹ bịan'a. Ọ rụngụọ a nị eze wụ Ahazị d'a lụaha.
12
Mgbe eze gi gha Damaskọsụ lụa, ọ hụn ukpo nchụn-ẹjan ahụn Yuria rụn; eze nọ nọkunmẹ ukpo nchụn-ẹjan ahụn kẹ w'a nọkunmẹ ẹ, nyinrin ẹ:
13
ọ chụn ẹjan w'a dụn ọkụn lẹ ẹjan ọka, huye manya, fe ẹdeke anụ o gi chụn ẹjan ekele ye ukpo nchụn-ẹjan ahụn.
14
O bupụ ukpo nchụn-ẹjan igwe-bronzu hụn te rị ihun Osolobuẹ, ihun Ụlọ-nsọ, ẹgbata ukpo nchụn-ẹjan ahụn ọ rụn lẹ Ụlọ Osolobuẹ kẹti-kẹti, bu ẹ che ẹbamịn-ugu ukpo nchụn-ẹjan ọhụn ahụn.
15
Eze wụ Ahazị nọzị ye Yuria onyẹ-isi nchụn-ẹjan iwu, sị, “Nọ ukpo nchụn-ẹjan ọhụnnị shịanị a chụn ẹjan w'a dụn ọkụn ụtụntụn lẹ ẹjan-ọka ẹnyasị, nọzị a a chụn ẹjan eze hụn w'a dụn ọkụn lẹ ẹjan-ọka eze lẹzi ẹjan ndị alị — ẹjan ile w'a dụn ọkụn lẹ oyiye ọka lẹ manya wẹ. Ịya kẹ y'e fezi ẹdeke anụ ile wẹ gi a chụn ẹjan w'a dụn ọkụn lẹ ẹjan ndị ọzọ. Mmẹ nwọn e gi Ukpo nchụn-ẹjan igwe-bronzu a jụ Osolobuẹ uche ẹ.”
16
Yuria onyẹ-isi nchụn-ẹjan nọ mẹ kẹ eze wụ Ahazị dọn gwa a.
17
Eze wụ Ahazị nọ wepụsọnmẹ ibe igwe-bronzu wẹ gi mẹmẹ ẹhụ trọkụ ndị rị ụlọ-nsọ wẹ gi e bu mirin, bupụsọnmẹ afẹrẹ rịsọnmẹ trọkụ ndị hụ. Ọ nọzị bupụ tankị-mirin hụ w'a kpọ “Ohimin” elu efin igwe-bronzu ndị hụ wẹ gi dọye ẹ, bu tankị hụ che elu ọmụma.
18
O wepụ okpukpu ahụn wẹ rụnye Ụlọ-nsọ, hụn w'a nọdị okpuru ẹ Ụhụọhịn Ezumikẹn, wepụzịkwọ ebe eze gha a banye Ụlọ-nsọ Osolobuẹ. Wẹ ile k'o gi channị eze Asiria ẹnya.
19
Ihiẹn ndị ọzọ mẹni kẹ Ahazị rị a kị lẹ ihiẹn o mẹ rị imẹ ẹkụkwọ w'e detọ ihiẹn ndị mẹ ogẹn ndị-nze Juda gisọnmẹ kị.
20
Ahazị a nwụnhụn, laburu ndị nẹdi ẹ, wẹ nọ li ẹ ye ebe wẹ liye wẹ imẹ Obodo hụ Defidi tụn. Hezikaya nwa a nọ họnrin eze nọkin ẹnya a.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes