Eaz bin ol twɛnti ia we i bi kiŋ ɛn i rul na Jerusɛlɛm fɔ sikstin ia. Lɛkɛ aw Devid bin de rul, in nɔ rul so; bifo dat i du wetin nɔ rayt na PAPA GƆD in yay;
Eaz fala dɛn ɔda kiŋ dɛn na Izrɛl dɛn bad trik ɛn ivin tek in bɔypikin mek sara na faya; dɔn na soso dɛn bad bad tin we dɛn ɔda neshɔn dɛn bin de du we mek PAPA GƆD drɛb dɛn kɔmɔt bifo di Izrɛlayt dɛn, insɛf du.
Eaz sɛn mɛsej to Kiŋ Tiglat Pilɛsa na Asiria se in nain bɔbɔ ɛn i no se i de fɔ am, so in de beg am lɛ i kam ɛp am fɔ fɛt di kiŋ dɛn na Siria ɛn Izrɛl we dɔn atak am.
Kiŋ Eaz go na Damaskɔs go mit Kiŋ Tiglat Pilɛsa. I si wan ɔlta de we i lɛk, so i drɔ di plan ɛn sɛn am to Yuraya we de mek sakrifays fɔ pipul sin fɔ bil di sem kayn ɔlta.
I pul di bras ɔlta we dɛn bin dɔn dɛdiket to PAPA GƆD kɔmɔt frɔnt di os usay i bin de midul di nyu ɔlta ɛn PAPA GƆD in os ɛn put am na di nɔth pat to di nyu ɔlta.
Kiŋ Eaz gi ɔda to Yuraya we de mek sakrifays fɔ pipul sin se na pan di nyu big ɔlta i fɔ de ɔfa di mɔnin animal sakrifays ɛn di ivin it sakrifays, wit di kiŋ in yon animal ɛn it sakrifays, ɛn ɔl di pipul dɛn na di kɔntri dɛn yon animal, it ɛn wayn sakrifays. Di kiŋ se i fɔ tɔn ɔl di blɔd fɔ sakrifays pan di ɔlta bɔt in go yuz di bras ɔlta fɔ de aks fɔ advays.
Kiŋ Eaz pul di bras ɔmɔlanke dɛn we bin de na PAPA GƆD in os wit di bol dɛn we bin de pan dɛn; i put di bras tank we bin de pantap di bras kaw dɛn ɛn put am pantap ston.
Dɔn igen fɔ pliz di kiŋ we kɔmɔt Asiria, i pul di stand kɔmɔt insay PAPA GƆD in os usay kiŋ in chia bin de tinap ɛn batin di domɔt we na de di kiŋ fɔ pas go insay PAPA GƆD in os.