×

Ika Bible 2018

2 Ndị-nze 18

1
Hụn mẹ ẹ ahụa ẹtọ Hoshia nwa Ẹla kịma ndị Izrẹlụ rị Ẹbamịn ugu kẹ Hezikaya nwa Ahazị họnrin eze ndị Juda.
2
Hezikaya rị nwa ahụa isẹn kwasị ọgụn k'o họnrin eze. Jerusalẹm k'ọ nọ kị. Ahụa itenẹi kwasị ọgụn k'ọ kị. Nnẹ ẹ wụ Abi (Abija) nwa Zẹkaraya.
3
Hezikaya mẹ ihiẹn rị Osolobuẹ mma ẹnya kẹ nẹdi ẹ wụ Defidi dọn mẹ.
4
Ọ kụsị ofufe hụ wẹ rị a dan Iwu e fe Osolobuẹ ebe jẹnsọnmẹ elu, kụkpọchanrịn ọmụma-nsọ ndị hụ wẹ gi e fe mmọn, gbutu osisi ndị wẹ zumẹ wẹ nọ a ghọ Ashẹra. O tigungwọn agwọ ahụn Mozizi gi igwe-bronzu kpụ, makẹni ndị Izrẹlụ hụkwọ a mụyeni agwọ hụ nsẹnsi d'e rukwọrị ogẹnni Hezikaya gi kị. (Ihiẹn w'a kpọ a wụ Nehush'tanị.)
5
Hezikaya gi Osolobuẹ wụ Chuku Izrẹlụ dọn ẹnya, onwọnni onyẹ nọ kẹ ya imẹ ndị-nze ile kị Juda, kẹ ndị bu ẹ ụzọ kẹ ndị o bu ụzọ.
6
O kwọnkẹnmẹ nke Osolobuẹ; o sọnbehini Osolobuẹ. O mẹsọnmẹ ihiẹn ndị Osolobuẹ gwa Mozizi gwa wẹ.
7
Osolobuẹ nọyezikwọn'a anọyeni, ihiẹn ile o mẹ nọ ghan'a. O kwerini nọdị okpuru eze Asiria, o fen'ẹ.
8
O mẹri ndị Filistia, kẹ ndị rị alị-ọfịa wẹ rụntọhụ ụlọ-nche butọ ndị-agha kẹ ndị rị obodo shịa ẹfọ wẹ tụnhunmẹ mgbọn, d'a pụkwọrị Gaza lẹ ebe ile rị okpuru Gaza.
9
Hụn mẹ ahụa ẹnọ Eze wụ Hezikaya kịma Juda, hụn mẹzikwọ a ahụa ẹsa Hoshia nwa Ẹla eze Izrẹlụ Ẹbamịn ugu kịma, Shal'manẹsẹ wụ eze Asiria nọ bịa d'a lụ obodo Sameria agha, kehunmẹ ẹ.
10
O zu ahụa ẹtọ wẹ kehunmẹ, ọ nọ ban a ẹka. Hụn mẹ ẹ ahụa isin Hezikaya kịma k'o mẹ. Ya wụ, hụn mẹ ẹ ahụa itenẹi Hoshia kịma Izrẹlụ kẹ ndị Asiria weri Sameria.
11
Eze Asiria nọ kpụn ndị Izrẹlụ shi Asiria, mẹ wẹ birisọnmẹ Hala, Gozanị rị mkpẹnrẹn Iyi-Habọ lẹ obodo ndị rịsọnmẹ alị ndị Mẹdịa.
12
Ọnwan mẹ makẹni emẹni wẹ ihiẹn Osolobuẹ wụ Chuku wẹ gwa wẹ, kama, e tikpọ wẹ iwu o gi kwọngbama ya lẹ wẹ — ihiẹn ile Mozizi wụ odibo Osolobuẹ sị wẹ mẹ. Egọnni wẹ ntịn ihiẹn ndị ọ gwa wẹ, emẹni wẹ wẹ.
13
Hụn mẹ ẹ ahụa mmẹnọ Hezikaya kịma, Sẹnakẹribụ wụ eze Asiria nọ bịa d'a maye obodo ile wẹ tụnhunmẹ mgbọn imẹ alị Juda, a banchanrịn w'a ẹka.
14
Ya Hezikaya wụ eze Juda nọ zi ozini jẹnni eze Asiria imẹ Lakishi ebe ọ rị ogẹn hụ: sị a, “E mẹfiegụọ m. Kin nwan azụụn, m k'a kụ ị ihiẹn ọwụlẹ ị sị m kụ ị.” Ya eze Asiria nọ be Hezikaya wụ eze Juda ẹkpa siliva uku ọgụn-mmisẹn lẹ ẹkpa goru uku iri-kwasị-ọgụn.
15
Ya Hezikaya nọ buyechanrịn a siliva ile Hezikaya wẹ hụn imẹ Ụlọ-nsọ Osolobuẹ lẹ ebe w'e dọnmẹ ihiẹn imẹ obi-eze.
16
Ogẹn ahụn kẹ Hezikaya gi heri goru wẹ gi ma ẹkwe ndị rị Ụlọ-NSỌ Osolobuẹ lẹ ndị ya nwẹn gi ma amanran-ụzọ Ụlọ-NSỌ Osolobuẹ, buzikwọ wẹ ye eze Asiria.
17
Eze Asiria nọ gha Lakishi zi Onyẹ-isi agha a, onyẹ-isi ndị-ọrụn a lẹ ọhaịmẹ hụn wụzị ọnụ-eze lẹ igunrun ndị-agha, nị wẹ d'e kunrun Hezikaya imẹ Jerusalẹm. E ru wẹ Jerusalẹm wẹ nọ wuzo ẹhụ uroro-amị mirin gha a e huye Ọmị rị Ibe elu, hụn rị ụzọ wẹ gha e jẹn Ogige Ọsụ-ẹkwa.
18
E zi wẹ wẹ d'a kpọ eze, ya kẹ Ẹliakim nwa Hil'kia hụn e lepụ obi-eze ẹnya, Shẹbụna hụn wụ akanwe lẹ Jụa nwa Asafụ hụn e dọnmẹ ẹkụkwọ nọ pụha d'e kunrun wẹ.
19
Ọnụ-eze Asiria nọ sị wẹ: “Gwa nị nwan Hezikaya sị: “Eze kanị, eze Asiria, sị, ‘Kịnị kẹ i gidẹ nwan e dọn ẹnya?
20
Ị hụhụ a jụ ire, a sị nị y'a marịnghọ ihiẹn i jẹnkọ d'e gi mẹri lẹni y'a lụka agha. Onyẹ k'i danbemẹ i gi e feni m isi?
21
Lekwọ ẹnya: ikẹnkwọ ị rị e gi Ijiptu e dọn ẹnya — ọkpọ achara-iyi hụ wẹ wagụnị, hụn e zupu onyẹ danbemẹn'ẹ ẹka o gi kwọndọn ẹ. Ẹrịra kẹ Fẹro eze Ijiptu e mẹkwọ ndị ile gi ẹ dọn ẹnya.
22
Ikẹnkwọ ụnụ a sị m nwan, “Osolobuẹ wụ Chuku ẹnyi kẹ ẹnyi gi dọn ẹnya.” Ẹlẹ Osolobuẹ kẹ Hezikaya wepụsọnmẹ ebe jẹn elu wẹ nọ e fe ẹ lẹ ukpo ndị wẹ nọ a chụnn'a ẹjan, sị ndị Juda lẹ Jerusalẹm, “Ukpo nchụn-ẹjannị rị Jerusalẹm kẹ ụnụ k'a nọrịrị e fe ofufe”?
23
“ ‘Kweyeni nwan di-nwọnni m wụ eze Asiria — e ye m'i ẹshin nnụ-isẹn, omẹni y'e nwọnghọdẹ madụ nnụ-isẹn k'e nyinni wẹ!
24
Nanị k'ị y'a dọn s'ẹka chedẹ ọkị-agha nta ohu imẹ ndị ọkị-agha di-nwọnni m, omẹni Ijiptu kẹ i gi e dọn ẹnya n'ị k'a gha ebahụn nwọnhẹn ụgbọ-ẹshin lẹ ndị-agha gi ẹshin a lụ agha?
25
I rodẹ nwan nị m pụhahụ d'a maye ebeni, tikpọ a, bụ ẹlẹ Osolobuẹ zi m? Osolobuẹ lẹ enwẹn ẹ zi m d'a maye alịnị ọgụn, tikpọ a.’ ”
26
Ya kẹ Ẹliakim nwa Hil'kia lẹ Shẹbụna lẹ Jụa nọ sị Ọnụ-eze Asiria, “Dodo, gi ebo, asụsụ ndị Aram, gwa ẹnyi ndị idibo i oku, ebe o mẹni ẹnyi a nụghọ a. Asụzịlẹni ẹnyi asụsụ Hibru ẹnyi amamgbe ndị nke ẹnyini rị elu mgbọn gha a nụ.”
27
Kanị Ọnụ-eze Asiria nọ sị wẹ, “Ụnụ rodẹ nị Di-nwọnni ụnụ lẹ ụnụ ndị-isi sụọ kẹ di-nwọnni m zi m d'a gwa ihiẹn ndịnị? Ụnụ ro nị ndị ahụn rị elu mgbọn arị ndị wẹ rị a gwa — ndịnị ẹgụn sikọ nwan d'e mẹ ri nsịn wẹ nyụn, ra mamịn wẹ nyụn — nọkẹ ụnụ nwẹn?”
28
Ya kẹ hụn ahụn a kị ndị-agha imẹ ọgbọ-agha nọdẹ weshi ọnụ elu gi asụsụ Hibru ndị Juda sị: “Nụ nị ihiẹn eze kanị, eze Asiria, ku!
29
Eze sị: Anịkwọlẹ nị Hezikaya dufie ọnụ. Ọ sakọkwọ ẹka gbapụha ọnụ ẹka m.
30
Anịkwọlẹ ni Hezikaya mẹ ọnụ gi Osolobuẹ dọn ẹnya, ebe ọ nọ a sị, ‘Osolobuẹ k'a gbapụharịrị ẹnyi; ewekọ wẹ obodoni ye eze Asiria.’
31
“Egọnkwọlẹ ni Hezikaya ntịn. Eze Asiria sị: Kweyeni ni m, ụnụ a gha imẹ obodo ụnụ pụha d'e we enwẹn ụnụ ye m, kẹni m nị onyẹ-onyẹ imẹ ọnụ nọdị, ri ihiẹn-ugbo ẹ — mkpụrụ vaịnị a lẹ mkpụrụ-osisi figi ẹ — ra mirin rị ọmị a
32
d'e ru mgbe m bịa d'e we ọnụ shi alị hụn nọ kẹ nke ụnụ: alị ọka lẹ manya ọhụn jun, alị hụn brẹdi lẹ alị vaịnị jun, alị osisi-olivu lẹ mirin-ẹnwụn jun. Hanrịn nị nwan ndụn; ahanrịnlẹ ni ọnwụn! “Egọnkwọlẹ ni Hezikaya ntịn, makẹni ndufie kẹ ọ rị e dufie ụnụ ebe ọ rị a sị, ‘Osolobuẹ k'a gbapụha ẹnyi.’
33
O nwọntughọ mmọn ọwụlẹ gbapụha ndị alị a ẹka eze Asiria?
34
Elebe kẹ mmọn ndị Hamatị lẹ Apadị rị nwan? Elebe kẹ mmọn Sẹfavụ, Hẹna lẹ Iva rị? Mmọn ndị alị Sameria a gbapụhaghọ Sameria ẹka m?
35
Elee hụn imẹ mmọn ndịnị ile satu ẹka gbapụha ndị alị a ẹka m? Nanị kẹ Osolobuẹ a dọn nwan s'ẹka gbapụha Jerusalẹm ẹka m?”
36
Ya ndị Juda ahụn nọ gba nkịtịn; ashịarịnị w'a oku, makẹni eze sị wẹ, “Ashịarịkwọlẹn'a oku.”
37
Ya kẹ nwa Hil'kia wụ Ẹliakim hụn e lepụ obi-eze ẹnya, Shẹbụna hụn wụ akanwe lẹ Jụa nwa Asafụ hụn e dọnmẹ ẹkụkwọ nọ kin azụụn d'e kunrun Hezikaya, wẹ lẹ ẹkwa wẹ dọka ye enwẹn wẹ olu, wẹ nọ gwachanrịn a ihiẹn ile Ọnụ-eze Asiria ahụn ku.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes