I pwɛl pwɛl ɔl dɛn ay ples we dɛn mek fɔ de wɔship lay lay gɔd, ɛn brok da gɔd we nem Ashɛra in lay lay gɔd. I brok da bras snek we Mozis bin mek bikɔs pipul dɛn bin de bɔn insɛns to am. Dɛn bin de kɔl di snek Nɛshutan
Ɛzikaya in bin put in op ɛn trɔs pan PAPA GƆD, Izrɛl in PAPA GƆD. Nɔn kiŋ nɔ ɛva rul Juda we tan lɛk Ɛzikaya; dɛn wan we bin de bifo am o, ɔ dɛn wan sɛf we kam afta am.
Di ia we mek Ɛzikaya fo ia as kiŋ, we na da sem ia de mek Oshia insɛf sɛvin ia as kiŋ na Izrɛl, Kiŋ Shalmanɛsa na Asiria mach go na Sameria ɛn le ambush de.
Ɔl dis bin bi bikɔs di pipul dɛn nɔ obe PAPA GƆD ɛn brok di Kɔvinant we de bitwin in ɛn dɛn, ɛn nɔ gri du ɔl wetin Mozis tɛl dɛn fɔ du. Wan wɔd dɛn nɔ yɛri.
So Ɛzikaya sɛn mɛsej to di kiŋ na Asiria na Lakish se in dɔn du rɔŋ, so lɛ i sɔri fɔ am, in go pe ɛnitin we i aks fɔ. Di kiŋ na Asiria aks Ɛzikaya fɔ gi am tɛn tawzin kilo silva ɛn wan tawzin kilo gold.
Di kiŋ na Asiria tɛl in ami kɔmanda wit di chif ɔfisa ɛn di fil kɔmanda se lɛ dɛn lɛf Lakish wit wan bataliɔn fɔ go na Jerusɛlɛm to Kiŋ Ɛzikaya. Dɛn ɔl lɛf fɔ go. Wɛn dɛn rich, dɛn telem na di jɔnkshɔn usay dɛn wan we de mek klos de wok, nia usay wata kin de gɛda.
Dɛn sɛn kɔl di kiŋ, na Ikayakim we na Ilkaya di administretɔ in bɔypikin wit Shɛbna we na di sɛktri ɛn Esaf in bɔypikin we na Joa we na klak, na dɛn go mit dɛn.
Di fil kɔmanda gi dɛn mɛsej fɔ di kiŋ. I se, “Dis na wɔd we kɔmɔt frɔm di gret kiŋ, di kiŋ na Asiria. Na wetin una gɛt we de lift una ɔp we mek una de blɔf so?
Una luk nɔ, una se una abop pan Ijipt fɔ ɛp una, we a go se dɛn fiba brumtik, we if una nɔ kiaful i go brok na una an ɛn chuk una. Di kiŋ na Ijipt nɔ bɛtɛ, i tan lɛk una. Ɔl udat abop pan am na brumtik.
Dɔn igen una min se a go jɛs kam nɔmɔ fɔ kam pwɛl ya if nɔto PAPA GƆD tɛl mi se fɔ du dat? Na PAPA GƆD insɛf sɛf tɛl mi se lɛ a mach kam insay dis siti ɛn pwɛl am.”
Na de Ilayakim we na Ilkaya in bɔypikin ɛn Shɛbna ɛn Joa tɛl di fil kɔmanda se lɛ i tɔk to dɛn na Arameik bikɔs dɛn de ɔndastand da laŋwej de; dɛn se lɛ i nɔ tɔk to dɛn na Ibru bikɔs di pipul dɛn we tap oba di wɔl de yɛri wetin dɛn de tɔk.
Bɔt di kɔmanda aks dɛn se if dɛn fil se na to dɛn ɛn dɛn masta nɔmɔ di kiŋ sɛn am wit da mɛsej de. I se if dɛn nɔ fil se di mɛsej na fɔ dɛn ɔl wit di ɔda man dɛn we sidɔm pantap di wɔl we na dɛn ɔl go gɛt fɔ it dɛn shit ɛn drink dɛn pis.
Una nɔ lɛ Ɛzikaya mek una chenj una maynd fɔ trɔs pan PAPA GƆD we i de tɛl una se PAPA GƆD go mɔs pul una na di kiŋ in an, i nɔ go mek di kiŋ na Asiria kapchɔ di siti.
Una nɔ lisin to Ɛzikaya o! Mi di kiŋ na Asiria de tɛl una naw se mek una mek pis wit mi ɛn jɔyn mi. If una du dat ɔlman go it di frut we in vayn tik ɛn fig tik de bia ɛn drink wata nain yon wɛl,
te a go kam kam pul una kɔmɔt de kɛr una na land we tan lɛk una yon, land we gɛt bɔku it, nyu wayn, bred, vayn gadin, land we gɛt ɔliv tik dɛn ɛn ɔni. Una pik layf, una nɔ pik fɔ day!” “Una nɔ lisin to Ɛzikaya bikɔs na ful i de mek una we i de tɛl una se PAPA GƆD go sev una.
We di gɔd dɛn we na dɛn Amath ɛn Apad de wɔship? We di gɔd dɛn we na dɛn Sɛfavaim, Ena ɛn Iva de wɔship? Dɛn bin ebul pul Sameria kɔmɔt na mi an we a ɔndaswɛt dɛn?
Uswan pan ɔl dɛn gɔd dɛn na dɛn kɔntri dɛn de dɔn ebul fɔ pul in kɔntri na mi an? Wetin mek una tink se PAPA GƆD go ebul pul Jerusɛlɛm kɔmɔt na mi an?”
Ilkaya in bɔypikin we na di administretɔ na di kiŋ in os in bɔypikin we na Ilayakim wit Shɛbna we na sɛktri ɛn Joa we na Esaf we de rayt in bɔypikin go to Kiŋ Ɛzikaya wit chɛr-chɛr klos ɛn tɛl am ɔl wetin di fil kɔmanda na Asiria se.