“Ngɑ̈nyi yi yïn, Yïn ɑ Jwøng-ɑ Ácwɑ̈ɑ̈j, kinni yɑ ɑ́bëëd ceth yɑ wør-ɑ yïn, o yɑ gɑ̈nn-ɑ yïn, o kwøbbí mïdhɑ’ mïdhø kì pyëwɑ, dhøgí nuti pyeem yɑn kinni tek, o yɑ nyi gwøg-ɑ gïn-ɑ dwɑddi yi yïn.” Kɑ óywöngø ki rɑ̈ɑ̈m pyëwe.
Yï óbëëdø ki runn pyɑ̈rø wïdɑ́bïj. Yï óyiel yi yɑn, wuki kɑɑl men kì cingi rɑ̈nhdwøøng Acuur. Kɑɑl men ókor yi yɑn kipe wøri nyingɑ geki per Debïd bɑ̈ngɑ, kí møg-ɑ ɑ́köbbɑ en.”
Alöggi Icɑyɑ̀ kinni, “Yï ónyudhi yi Jwøng-ɑ Ácwɑ̈ɑ̈j ki ngïji me nyodh kinni dhøge ómïdhe. Yï dwɑdd-ɑ kinni tïbø men døøge cyɑ̈n, wɑlɑ̀ kedhe mɑl ki pɑ̈ltyel pyɑ̈rø?”
Akwɑjji Jwøng-ɑ Ácwɑ̈ɑ̈j yi Icɑyɑ̀, kɑ tïbø dwøøg cyɑ̈n yi Jwøng-ɑ Ácwɑ̈ɑ̈j ki pɑ̈ltyel pyɑ̈rø, kì kömi yïdhi men-ɑ ɑ́ger yi Rɑ̈dh Akɑɑdh ɑ́ men nyi røm cyɑ̈dhi cɑ̈ng.
Kɑ Icɑyɑ̀ ópëjjø kinni, “Á ngø ɑ ɑ́lidh yi gen kì gøldwøng?” Kɑ Kedhekiyɑ̀ ólöggø kinni, “Jɑmmì bënn ɑ́lidh yi gen, bong gïjø mɑ ɑ́döng e nuti nyudhi gen yi yɑn kì kɑ̈jj-ɑ kɑnni jɑmmì, kí gøldwøng.”
Gïg-ɑ kyeelø møg-ɑ ɑ́gwøg yi Kedhekiyɑ̀ bënn, kí kwøbbi tegi pyëwe, kí kër-ɑ ɑ́gööge ki luy, kí kër-ɑ ɑ́kunye ki wøl me kɑ̈ɑ̈l pï kɑɑl, bɑ ɑgwed kì yij Wɑ̈nyi Rɑ̈nhi Yeudiyɑ̀.