×

Ika Bible 2018

2 Ndị-nze 22

1
Josaya rị nwa ahụa ẹsatọ k'o họnrin eze. Ọ nọ kị ahụa mmanaị kwasị ọgụn. Imẹ Jerusalẹm k'ọ nọ kị. Nnẹ ẹ wụ Jedida nwa Adaya onyẹ Boz'katị.
2
O mẹ ihiẹn rị mma ẹnya Osolobuẹ, sọnchanrịn nzọmụkụ nẹdi ẹ wụ Defidi; ọ ghan'a pụ shi ẹka-nni mọbụ ẹka-ekpẹn.
3
Hụn mẹ ẹ ahụa mmẹsatọ Josaya kịma, ọ nọ zi akanwe wụ Shafanị nwa Azalia nwa Mẹshulam jẹn imẹ Ụlọ-nsọ Osolobuẹ. Ọ sị a,
4
“Jẹn d'e kunrun Hil'kia onyẹ-isi nchụn-ẹjan. Y'e wegbama egho wẹ wẹhẹ imẹ Ụlọ-nsọ Osolobuẹ, hụn ndị nche ọnụmụzọ nahangụ ndị rị a bịa Ụlọ-nsọ.
5
We wẹ ye ndị wẹ buche ọrụn wẹ rị a rụn Ụlọ-nsọ ẹka, kẹni wẹ gi ẹ kụ ndị ahụn rị e dọnzi Ụlọ-nsọ Osolobuẹ ụgwọ:
6
ndị a ma ụlọ, ndị rị a tụnnị lẹ ndị e dọnni; wẹ nọzị imẹ ẹ ṅọnrin osisi lẹ ọmụma ndị wẹ bechan gi dọnzi Ụlọ-nsọ.
7
Ẹlẹkwọ hụn wẹ e gi jụma wẹ kẹ wẹ mẹ egho hụ wẹ buche wẹ ẹka, makẹni wẹ rị e gi ezioku a rụn a.”
8
Ya kẹ Hil'kia onyẹ isi nchụn-ẹjan nọ sị Shafanị wụ akanwe, “A hụnọlẹ m Ẹkụkwọ Iwu imẹ Ụlọ-nsọ Osolobuẹ.” Ọ nọ we Ẹkụkwọ Iwu hụ ye Shafanị. Shafanị nọ gụn a.
9
Ya Shafanị wụ akanwe nọ jẹn d'a gwa eze k'o jẹn, sị a, “Ndị-isi i e gigụọ egho rị Ụlọ-nsọ Osolobuẹ kụ ụgwọ; e wegụọ w'a ye ndị ọrụn lẹ ndị ọrụn Ụlọ Osolobuẹ rị ẹka.”
10
Ya kẹ Shafanị wụ akanwe nọzị sị eze, “O nwọn ẹhụhụọ Hil'kia onyẹ isi nchụn-ẹjan ye m.” Shafanị nọ nọ idẹnya eze gụn a.
11
Ogẹn eze gi nụ oku ndị rị imẹ Ẹkụkwọ Iwu, ya ọ nọ dọka ẹkwa ye enwẹn ẹ olu.
12
Ọ nọ han Hil'kia onyẹ nchụn-ẹjan, Ahikam nwa Shafanị, Akịbọ nwa Maịkaya, Shafanị wụ akanwe lẹ Asaya hụn e jẹnni eze ozi, sị wẹ,
13
“D'a jụnịnị m Osolobuẹ — mmẹ lẹ ndị alịnị lẹ Juda ile — banyeni ihiẹn wẹ deye imẹ ẹkụkwọnị wẹ hụn. Olulu Osolobuẹ gi e sọn ẹnyi e hikẹ, makẹni ndị nẹdi ẹnyi esọnni oku ndị wẹ deye imẹ ẹkụkwọnị; egini wẹ ihiẹn ndị wẹ deyeni ẹnyi ebẹhụ rụn ọrụn.”
14
Hil'kia wụ onyẹ isi nchụn-ẹjan, Ahikam, Akịbọ, Shafanị lẹ Asaya nọ jẹn d'a gwa okpoho onyẹ amụma wụ Hul'da, nwunyẹ Shalum nwa Tikva nwa Hahasị, Hahasị hụn e lepụ ebe wẹ e dọnmẹ ẹwuru ẹnya imẹ Ụlọ-nsọ. Idumu nke Ẹbụọ rị Jerusalẹm kẹ Hul'da bi.
15
Ya kẹ Hul'da nọ sị wẹ, “Lee ni ihiẹn Osolobuẹ wụ Chuku Izrẹlụ ku: Gwa nị onyẹ hụn zihẹni ụnụ, sị,
16
‘Lee ihiẹn Osolobuẹ ku: M k'e tikpọ obodoni lẹ ndị alịnị, mẹ wẹ ihiẹn ile rị imẹ ẹkụkwọ hụ eze Juda gụn.
17
Makẹni a jụgụọ wẹ m tọ, mụmanị mmọn-lẹ-iyi nsẹnsi, gi mmọn-lẹ-iyi ẹka wẹ mẹmẹ kpasu m iwe, m k'e gi olulu m sọn obodoni; onunu m k'e gi sọn ẹ arọkọ.’
18
Sị nị eze Juda hụn zi ọnụ d'a jụ Osolobuẹ: ‘Lee ihiẹn Osolobuẹ wụ Chuku Izrẹlụ ku banyeni oku ndị hụ ị nụ:
19
Ebe o mẹni ọ fụ ị afụ lẹni i welụa enwẹn i alị ihun mmẹ wụ Osolobuẹ ogẹn i gi nụ ihiẹn m ku ni m k'e mẹ obodoni lẹ ndị rịn'a, nị wẹ k'a wụrụ ihiẹn wẹ bụ ọnụ lẹ ihiẹn la iwi, ị nọ dọka ẹwuru ndị i yi ye enwẹn i olu, kwan ẹkwa ihun mmẹ wụ Osolobuẹ — a nụgụọ m; ya kẹ Osolobuẹ ku.
20
Makẹ ufiri ẹ, m k'e cheri n'i laburugụ ndị nẹdi i, e ligụ wẹ i udọn lẹ ndọnkwa, o kebe mẹ. Y'e gikọ ẹnya ị hụn ntikpọ m jẹnkọ d'e tikpọ obodoni.’ ” Ya wẹ nọ kin azụụn d'a gwa eze ihiẹn okpoho onyẹ-amụma ahụn ku.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes