Josia ge a thoma go buša o be a na le nywaga e seswai; o feditše nywaga e masome a mararo a motšo o tee a le kgoši motseng wa Jerusalema. Leina la mmagwe e be e le Jedida morwedi wa Adaya wa Bosikata.
Ka ngwaga wa lesome le metšo e seswai wa pušo ya gagwe, o kile a roma Safane mongwadi morwa wa Atsalia morwa wa Mesulama, a re a ye Ngwakong wa Morena, a re:
Rotogela go Hilikia moperisita e mogolo, o re a bale ditšhelete tše di tlišitšwego Ngwakong wa Morena. Tše baleti ba mojako ba di kgobetšego go setšhaba.
A a di neele bahlapetši ba modiro diatleng, ba ba beilwego go laka Ngwako wa Morena; bona ba nee badiri ba mediro ba mo Ngwakong wa Morena, ba ba lokišago mo Ngwako o onalago.
Ke mo moperisita e mogolo Hilikia a boditšego Safane mongwadi a re: Nna ke hweditše puku ya melao fa Ngwakong wa Morena. Gomme Hilikia a neela Safane puku yeo, a re a e bale.
Safane mongwadi a tla go kgoši a e anegela a re: Bahlanka ba gago ba kgobetše ditšhelete tše ba di hweditšego Ngwakong wa Morena, gomme ba di neetše bahlapetši ba mediro diatleng, e lego bona balaki ba Ngwako wa Morena.
Yang le botšiše Morena ka baka laka, le ka baka la setšhaba, le ka baka la Juda ka moka. Le botšiše taba ya puku ye e hweditšwego; gobane bogale bja Morena ke bjo bogolo; bo re tuketše ka gobane botata wešo ba sa ka ba kwa se puku ye e se bolelago, ba sa ka ba dira tšohle tše re ngwaletšwego tšona.
Hilikia moperisita, le Ahikama, le Akiboro, le Safane, le Asaya, ba ya go Huluda moporofeta wa mosadi, mogatša wa Salume morwa wa Thikwa morwa wa Harahasi moloti wa diaparo. Ge e le Huluda o be a agile motseng wa Jerusalema ka thoko e nngwe. Ba tla ba bolela le yena.
Morena Modimo wa Isiraele o re: Le tsebe gore motse wo ke o tlišetša dikotsi tše di tlogo wela batho bohle ba ba agilego go wona, tšona tšeo di ngwadilwego pukung yeo e badilwego ke kgoši ya Juda.
Ke tla di dira ka gobane ba ntahlile, ba thuntšhetša medimo e šele diorelo, ba rumola nna ka mediro ka moka ya diatla tša bona; bjale bogale bjaka bo tlo tukela motse wo, bja se ke bja tingwa.
Ge e le wena -- ka gobane pelo ya gago e letafetše, wa ikokobetša pele ga Morena mola o ekwa tše ke boletšego motse wo le baagi ba wona ka tšona, ka re o tlo ba setšhošetši le lešapa, mme wa ntelela -- wena ke go kwile! Morena o realo.
Bjale tsebage; wena ke tlo go goroša go botatago; o tlo išwa lebitleng la gago e le šebešebe, mme mahlo a gago a ka se ke a bona dikotsi ka moka tše ke tlogo di tliša felo fa. Phetolo yeo ba e iša go kgoši.