A Sedesiyas naama yʋʋmd a wɛ soaba, kiuug piig soaba, kiuuga piig daare, Babilon dĩma a Nabikodonozor, waa ne a tãb-biis fãa n kaoog zabre ne Zerizalɛɛm, a gãnega a tãpo tẽngã noore n tu boko n gũbg-a.
Dĩma yii yʋngo n zoe ne a tãb-biisa fãa, a tũu dagnoor ninga sẽn be lals a yiibã sʋka, naab zẽeda dignoore. Dẽ tɩ Kalde rãmba da gũbga tẽngã, la a rɩka Yamsem Mogra sore.
Kiuug a nu soaba, daar a yopoe daare, a Nabikodonozor, Babilon dĩma, naama yʋʋmd piig la a wɛ soaba, a Nebuzaradã, tãnsoaba, la Babilon dĩma komber a yembre, kẽe Zerizalɛɛm.
Da-luk a ye fãa woglem da yaa kãntɩɩs piig la a yopoe. B ra paasa b woglem na ta kãntɩɩs a tãabo ne zũudu la b paasa b neerma ne zũud gãmbre la tɩ-biis wa pooloomse sẽn dõog ne zũudu. Zũuda ra-luga ra wẽnda taaba, gãmbs a yiiba me ra wẽnda taaba.
Tẽnga pʋgẽ a yõka ned ninga sẽn da so tãb-biisa yɛla welgre, n paas neb a nu sẽn be dĩma zakẽ, n paas ned ninga sẽn geta tãb-biisa yãkre, n ya tãnsoaba, n paas Zɩɩda tẽnga kamb pisoobe; bãmb fãa da bee Zerizalɛɛm.
Tãnsoaben-dãmba la neba fãa bãngame tɩ Babilon dĩma da yãka a Gedaliya t'a yɩ kombere, tɩ b waa a nengẽ, Mispa: yaa a Ismayɛl, a Netaniya biiga; a Zoana, a Karea biiga; a Seraya, a Tanewumɛt biiga, Netofɛt daoa; a Yazaniya, Maaka daoa.
Kiuug a yopoe soaba sẽn ta, a Ismayɛl, a Netaniya biiga la a Elisama yagenga, na-koms buudu, wa n kʋ-la a Gedaliya n paas Zɩɩda la Kalde rãmba sẽn da be-b ne bãmb Mispa.
Zɩɩda dĩm a Zoakẽ sẽn kẽ yembdo tɩ yʋʋm pis-tã la a yopoe, kiuug piig la a yiib soaba, kiuuga rasem pisi la a yopoe daare, Babilon dĩma, a Evil Merodak, kũma dĩma nimbãanega n yiis-a roogo.