Ya ọ nọ zi ozini jẹnni Jehoshẹfatị wụ eze Juda: “Eze Mụabụ e femẹgụọnị m isi. Nị ị sọnjẹn m d'a lụsọn ndị alị Mụabụ agha?” Jehoshẹfatị nọ sị a, “Mmẹ lẹ ịyụ wụ ohu; ndị nke m wụ ndị nke i; ẹshin m wụ ẹshin i.”
Ẹlaịsha nọ sị a, “Ma Osolobuẹ nwọn ikẹn ile hụn m wụ odibo ẹ, omẹni ẹlẹ hụn m rị e lee eze Juda wụ Jehoshẹfatị ẹnya ihun, m'e ke feyedẹn'i ẹnya mọbụ buchen'i ọnụ.”
Ụnụ k'e tikpọchanrịn obodo ile wẹ tụnhunmẹ mgbọn lẹ obodo ile rị mkpa. Ọnụ k'e gbutuchanrịn osisi wẹ ile rị mma, gi ihiẹn fakin isi-mirin wẹ ile, kpọn ọmụma jun ugbo ile rị mma wẹ rụn.”
Ogẹnni, ndị Mụabụ a nụgụọ nị ndị-nze ndị hụ a bịagụọ d'a lụsọn wẹ ọgụn. Ya wẹ nọ kpọpụha ikẹnnyẹ wẹ ile, kẹ ikoro kẹ ikẹnnyẹ-ọba, hụn k'a s'ẹka bu ihiẹn-ọgụn, wẹ ile nọ pụha okẹn d'e che.
Kanị, mgbe ndị nke wẹ gi ru ebe ndị Izrẹlụ rị, ya ndị Izrẹlụ nọ maye wẹ ọgụn, d'e ru n'a gbanị wẹ ndị Izrẹlụ ọsọ. Ndị Izrẹlụ nọ chụ wẹ, gbu wẹ eje-ogbugbu.
E tikpọsọnmẹ wẹ obodo ndị Mụabụ; okẹnnyẹ ọwụlẹ nọ masọnmẹ ọmụma ye ugbo ile rị mma, ma a d'e ru ni ọmụma e kpumẹchanrịn ugbo. A fakinchanrịn wẹ isi-mirin ile rị alị hụ, gbutuchanrịn osisi ile rị mma rị alị ahụn. Kiri-Harẹsẹti sụọ nọ họdụ, enutuni wẹ ọmụma ndị wẹ gi tụn a, kanị ndị a gba araba nọ kehunmẹ ẹ, kịzịkwọ ẹka nụmanị ya nwẹn.
Ya eze Mụabụ nọ weri okẹnnyẹ ibuzọ a, hụn nkẹ e rikin ẹ eze, nọ elu mgbọn obodo hụ gi ẹ chụn ẹjan w'a dụn ọkụn. Okẹn ize nọ ban ndị Izrẹlụ, ndị Izrẹlụ nọ la alị wẹ.