Judai rama Jehosafata kum sâwm leh pariat a lal kum khân, Ahaba fapa Jehorama chu Israel ramah a lal ṭan a. Samaria khuaah kum sâwm leh pahnih a lal a.
Juda lal Jehosafata hnênah, “Kan lakah Moab lal a hel ta a, min beihpui thei ang em?” tiin thu a thawn a. Lal Jehosafata chuan, “Ka rawn pui ang che; ka mite leh i mite chu pumkhat kan ni alâwm.
Lal Jehorama te, Juda lal leh Edom lalte chu an thawk chhuak a, ni sarih an kal hnuin tui an tlachham ta a. Mihring in tûr pawh, an puakphur ran in tûr pawh a awm hiau tawh lo.
Lal Jehosafata chuan, “ Lalpa min râwnsak thei tûr zâwlnei an awm em?” a ti a. Jehorama sipai hotu pakhat chuan, “Safata fapa Elisa he laiah hian a awm, zâwlnei Elija hnungzui ṭhîntu kha,” a ti a.
Elisa chuan Israel lal hnênah, “Engah nge ka ṭanpui ang che, i nu leh pate biakrâwn zâwlneite kha va râwn la a ni mai alâwm,” a lo ti a. Jehorama chuan, “Amah, Lalpa hi alâwm he lai lal pathum hi Moab lal kuta min dahtu chu,” a ti a.
Elisa chuan, “A rawng ka bâwl, mi nung Lalpa chhâlin, Judai ram lal Jehosafata hi pawisa lo ila chu, kawng eng mahin ka pui lo vang che, ka lo ti asin le,” a ti a.
Lalpa chuan heti hian a ti: ‘Thli tleh lovin chhûm hmu lo mah ula, ruam chu tuiin a khat dâwn; chu chu in rante leh in sate nên in in dâwn nia,’ a ti e.
Kulh nei khua leh khaw nuam deuh deuh tawh phawt chu in tichhia ang a, thing ṭha deuh deuhte chu in kit ang a, tuikhur zawng zawng in hnawh ang a, lo ṭha laiah lung in dah thluah dâwn nia,” a ti a.
Moab-ho chuan anmahni bei tûr lal pathumte chu an lo kal tih an hriat chuan mipa râlkai chin tawh phawt chu, naupang ber pawh, upa ber pawh an pung khâwm a, an ramri an lo vêng a.
An khuate chu an tihchhiatsak a, an lo ṭha laiah te chuan Israel-ho veivâk chuan lung an paih zêl a, an lote chu lunghmun a ni ta ngawt a. Tuikhurte chu an hnawh a, thei kûngte an kit a, a tâwpah chuan khawpui ber ‘Kir-hareset’ chauh a la chhe lo va, chu pawh chu virvawma beituten an hual a.
Moab lal chuan hmêlmate chu a hneh dâwn lo tih a hriat chuan khandaih keng sipai zasarih nên hmêlma rual chu sut tlanga, Suria lalrama tlân a tum a; mahse, a thei lo.
Tichuan, a fapa upa ber, a aiawhtu tûr chu a man a, Moab-ho pathian hnênah kulh bang bulah chuan a talh a, a hlân a. Israel miten an hmuh chuan an hlau hle a, khua chu an kalsan a, an ram lamah an haw ta a.