|
| 1 |
|
| Omu mwaka gwa ikumi na munaana ogw'omu busingye bwa Yehoshafaati omugabe wa Yuda, Yehoraamu mwene Ahabu akaba omugabe wa Isiraeli omuri Samariya; yaamara aha ngoma emyaka ikumi n'ebiri. |
|
| 2 |
|
| Yaakora ebirikugwisa kubi Nyakubaho; nobu araabe atarashushaine na ishe na nyina, ahabw'okuba we akahigura enyomyo ya Baali ei ishe yaabaire abyaire. |
|
| 3 |
|
| Kwonka akaguma naakora ekibi kya Yeroboamu mwene Nebati eki yaacumuziise Isiraeli, tiyaakireka. |
|
| 4 |
|
| Mbwenu Meesha omugabe wa Moabu akaba ari omworozi w'entaama. Buri mwaka naatoijera omugabe wa Isiraeli abaana b'entaama akasiriira kamwe n'ebyoya by'empaya z'entaama akasiriira kamwe. |
|
| 5 |
|
| Kwonka Ahabu ku yaafiire, omugabe wa Moabu yaagomera omugabe wa Isiraeli. |
|
| 6 |
|
| Omugabe Yehoraamu nikwo kuruga Samariya omu bunaku obwo, akahuruza Isiraeli yoona. |
|
| 7 |
|
| Akatuma ahari Yehoshafaati omugabe wa Yuda ati: Mbwenu omugabe wa Moabu angomeire. Mbwenu noija kuhurura naanye tukateera Moabu? Onu amugarukamu ati: Eego, niinyija kuhurura. Manya nyowe naiwe turi bamwe, abantu bangye nibo bantu baawe, n'embaraasi zangye nizo zaawe. |
|
| 8 |
|
| Bwanyima amubuuza ati: Tuhurure nitutoora muhanda ki? Yehoraamu amugarukamu ati: Tutoore ogw'eihamba rya Edomu. |
|
| 9 |
|
| Atyo omugabe wa Isiraeli ahurura, n'omugabe wa Yuda n'owa Edomu. Ku baagyenzire orugyendo rw'ebiro mushanju nibeekiikuura, baabura amaizi g'okuha eihe ryabo, n'enyamaishwa zi baagyenzire nazo. |
|
| 10 |
|
| Omugabe wa Isiraeli nikwo kuborooga ati: Ai bambe! Nyakubaho atureetsire aha abagabe twenshatu kuturekurira omugabe wa Moabu. |
|
| 11 |
|
| Yehoshafaati amubuuza ati: Beitu kunu tihariyo murangi wa Nyakubaho, ou twakwehanuuzaho ahari Nyakubaho? Omwe aha bagaragwa b'omugabe wa Isiraeli agarukamu ati: Kunu hariyo Elisha mwene Shafati, owaabaire anaabisa Eliya engaro. |
|
| 12 |
|
| Yehoshafaati agira ati: Ogwo niwe aine ekigambo kya Nyakubaho. Omugabe wa Isiraeli na Yehoshafaati n'omugabe wa Edomu nikwo kugyenda, bakaza ei ari. |
|
| 13 |
|
| Elisha agira omugabe wa Isiraeli ati: Nyine kakwate ki naiwe? Irooko oyehanuuze aha barangi abaragurira sho na nyoko. Omugabe wa Isiraeli amugira ati: Ngaaha! Nyakubaho niwe atuhurwize, itwe abagabe twenshatu, ngu aturekurire omugabe wa Moabu. |
|
| 14 |
|
| Elisha amugira ati: Nindahira Nyakubaho ow'amahe, ou mpeereza; kuri ntaagirira nshoni Yehoshafaati omugabe wa Yuda, tinkukucwire ryera, nobu kwakuba okukureeba. |
|
| 15 |
|
| Kwonka hati nimundeetere omuteezi w'enanga. Omuteezi w'enanga ku yaagiteire, amaani ga Nyakubaho gaamuzamu. |
|
| 16 |
|
| Yaabagira ati: Nyakubaho yaagira ati: Ogu mukura gwomire, naaza kugwijuza ebiyanja. |
|
| 17 |
|
| Ahabw'okuba Nyakubaho naagira ati: Timurikwija kureeba muyaga nari njura; kwonka ogu mukura nigwija kwijura amaizi, muganywe, imwe n'amatungo gaanyu, n'enyamaishwa zaanyu. |
|
| 18 |
|
| Ekyo n'ekintu kyanguhi ahari Nyakubaho; kandi naija kubarekurira Abamoabu, mubasingure. |
|
| 19 |
|
| Musingure na ibara rurembo rw'ebigo bigumire, n'orurembo rwona orurungi, muteme emiti yoona emirungi, mwigare enshuro z'amaizi zoona, mwijuze emisiri yaabo emirungi amabaare, mugishiishe. |
|
| 20 |
|
| Akasheeshe kaakuratsireho, omu bunaku bu batambiramu ekitambo, ahonaaho amaizi gaahimintika nigaruga orubaju rwa Edomu, okuhitsya obu gaijwire ekyo kyanga. |
|
| 21 |
|
| Abamoabu boona ku baahuriire ngu abo bagabe baizire kubarwanisa, baahuruza abantu boona barikubaasa kujwara eby'okurwanisa, okwiha aha muto okuta aha mukuru; baatengyera orugamba aha mwatano. |
|
| 22 |
|
| Ku baagurukire kare omu kasheeshe eizooba ryayaka aha maizi, Abamoabu baareeba amaizi agabari omu maisho nigatukura nk'eshagama. |
|
| 23 |
|
| Baagira bati: Egi n'eshagama, buzimazima abagabe barwaine baitana. Mbwenu itwe Abamoabu ka tuze kwenyagira eminyago. |
|
| 24 |
|
| Kwonka ku baahikire aha rusiisira rw'Abaisiraeli, Abaisiraeli baimuka baabarwanisa, baababinga, baagyenda nibabaita, okuhitsya obu baabahikize omu nsi yaabo; |
|
| 25 |
|
| bakacwekyereza endembo zaabo, buri murwani akatambika eibaare omu misiri yaabo emirungi, bakaigara enshuro z'amaizi zoona, bakatema emiti yoona emirungi okuhitsya obu Kirihareseti orurembo rukuru rwatsigaireho rwonka, ab'enjungu bakarugota, bakarusingura. |
|
| 26 |
|
| Omugabe wa Moabu ku yaareebire orugamba rwamugyendera kubi, yaayataguza n'abashaija be magana mushanju enkwata-rurara, kuraba ahu omugabe wa Edomu atengyeire orugamba, ngu abone kumuhika; kwonka tiyaabaasa. |
|
| 27 |
|
| Nikwo kutwara omutabani omukuru owaabaire ari ow'okumuhungurira, akamutambira aha mutwe gw'orugo rw'orurembo kuba ekitambo kicwekize. Haza ekyo kikabiihiza munonga Abaisiraeli, baakambura orusiisira rwabo, baagaruka owaabo. |
|
|
|
|