Pinmakiana hi Eliseo, “Diin kahulog?” Ginpakita hiya han tawo han dapit nga nahulogan, ngan inmutod hin sanga hi Eliseo, igin-itsa ito ha tubig, ngan linmutaw an surab han parakol.
Binmaton in usa ha ira, “Waray, Harangdon nga Hadi. An manaragna, hi Eliseo, amo an parasumat han hadi han Israel han imo iginyayakan nga sekreto bisan didto han imo kalugaringon nga kwarto.”
Sayo pa han pagkaaga, binmangon an surugoon ni Eliseo, ginmawas han balay, ngan kinmita han Siriahanon nga kasondalohan, upod an ira kakabayohan ngan mga karuwahe, nga nagpapalibot han bungto. Binmalik hiya ngan ginsiring hi Eliseo, “Waray na mahihimo naton. Ginpalibotan na kita.”
Ngan nag-ampo hiya, “O Ginoo, pukrata an iya mga mata, ngan pakitaa hiya.” Pinamatian han Ginoo an iya pag-ampo, ngan han paghangad han surugoon ni Eliseo, hinkit-an niya nga an ligid han pungtod luob na hin kakabayohan ngan mga karuwahe nga kalayo nga nagpapanalipod kan Eliseo.
Ngan nasingadto ha ira hi Eliseo ngan nagsiring, “Diri ini amo an dalan; diri ini amo an bungto nga iyo ginbibiling. Sunod ha akon ngan itututdo ko kamo han tawo nga iyo ginbibiling.” Ngan gindara niya hira ngadto ha Samaria.
Han paghisulod na nira han syudad, nag-ampo hi Eliseo, “O Ginoo, pukrata an ira mga mata, ngan pakitaa hira.” Pinamatian han Ginoo an iya pag-ampo; nagpakakita hira, ngan nakasabot hira nga nakadto na hira ha sakob han Samaria.
“Ayaw,” binmaton hiya. “Bisan ngani an mga sondalo nga imo nabihag ha pag-awayan diri angay nimo patayon. Pakaona ngan paimna hira, ngan pabalika hira ngadto han ira hadi.”
Sanglit naghatag ha ira hin dako nga kombite an hadi han Israel; ngan katapos nira pangaon ngan panginom, ginpabalik niya hira ngadto han hadi han Siria. Tikang hadto waray na sumulong han tuna han Israel an mga Siriahanon.
Tungod hini nga pagsulong, makalilisang an gutom ha syudad, nga iginbaligya na hin 80 ka bug-os nga salapi an usa nga ulo hin asno, ngan lima ka bug-os nga salapi an usa hin tunga ka salmonan nga iti hin sarapati.
Ano an nakakasamok ha imo?” Binmaton hiya, “Naghangyo ha akon hadton usa ka adlaw ini nga babaye nga kakaonon namon an akon anak, ngan pagkabuwas an iya na man anak an amon kakaonon.
Han pakabati hini han hadi, ginggisi niya an iya panapton tungod hin kabaraka, ngan hinkit-an hiya han mga tawo nga hirani han pader nga nakakasul-ot hiya hin sako ha ilarom han iya panapton.
Ngan nagsugo hiya hin surugoon pagkuha kan Eliseo. Hini nga higayon nakadto ha iya balay hi Eliseo kaupod in katigurangan nga naduaw ha iya. Han waray pa aabot an sinugo han hadi, nagsiring ha katigurangan hi Eliseo, “An hadi nagsugo hin tawo hin pagpatay ha akon. Pag-abot han iya ginsugo, sadhi an porta ngan ayaw hiya pasudla. Masunod gud dayon ha iya an hadi.”
Pakahuman la niya pagyakan, inmabot an hadi ngan nagsiring, “An Ginoo an nagpadara ha aton hini nga kakurian! Sanglit diri na ako mahulat han iya kon ano an iya bubuhaton.”